Զինեք ժողովրդին, նա պատրաստ է իր հողը պաշտպանելուն

03-04-2023 10:45:53 | Հայաստան | Քաղաքական

ՄԻԹԵ ՀԱՅԵՐԵՆ ՉԵՄ ԱՍՈՒՄ...

Զարմանում եմ` ինչ պայմանագրի մասին է խոսքը, երբ Հայաստանը Ադրբեջանին պատերազմ չի հայտարարել, ինչու են լռում հայ իրավաբաններն ու միջազգային գործիչները: Ինչպես կարելի է երկրիդ սահմանների նկատմամբ ոտնձգություններ անող ագրեսորին Հայաստանի տարածք թողնել /միթե մոռացել եք սահմանամերձ գյուղերի լքված տները/, և նույնիսկ Խաղաղության պայմանագիր կնքելու մասին մտածել: Խաղաղությունը Արևմուտքի վարագույրն է, պարոնայք, իսկ Հայաստանին էլ լուսամուտ չի մնացել, որ վարագույր կախենք... մենք 100 տարուց ավել շրջափակված ենք, առավելապես` այսօր... Հայերեն եմ ասում` թուրքի երախտագիտությունը սրի ծայրին կապած շահն է` Արևմտյան Հայաստանը Ղարսի խայտառակ հանձնումով զիջեցի՞ք, Նախիջևանը զիջեցի՞ք, Ախալքալակը նվիրեցի՞ք, Արցախի յոթ շջանները հանձնեցի՞ք Իհարկե, ինչի մասին է խոսքը, որ ինչ լիներ, եղա՞վ, իհարկե ոչ: Եթե ձեզ թվում էր Ալիևի անհագուրդ ախորժակը դրանով բավարարվելու է, սխալվեցիք` Հայաստանը, որպես վերջին խոշոր ոսկոր, որը մնալու է Ալիևի և Էրդողանի կոկորդին, լայն տեմպերով ուզում են կուլ տալ, նախապես իրենց ժողովրդի մեջ հայատյացություն սերմանելով և Հայաստանը անվանելով Արևմտյան ադրբեջան... ,,ԱՐԻ ՎԱՐԴԱՊԵՏ, ՄԻ ԽԵԼԱԳԱՐՎԻ,, կասեր Պարույր Սևակը... Որքան ասեցինք չպատասխանենք, չկրակենք, այնքան իրենք կրակեցին ու սպանեցին, հրետակոծելով անգամ Հայաստանի հանրապետության գյուղերն ու քաղաքները: Այսօր էլ ապօրինի մտել են Տեղ գյուղի վարելահողերն ու սարսափի մեջ են պահում տեղի բնակիչներին: Չեղավ եղաբայրներ, ժողովուրդն ինքը պատրաստ է իր հողը պաշտպանելուն, զինեք նրան և ուժ ու ոգի հաղորդեք իր ինքնապաշտպանության փարոսը դառնալուն, այլապես հույսը դնել թշնամուն խելքի բերելու վրա, խաղաղությունը միայն երազանք կմնա...

Ռուզան Ասատրյան

գրող - հրապարակախոս

Նոյյան տապան - Քաղաքական