Հայաստանը ՄԱԿ-ի դատարանին ծանուցել է Ադրբեջանի հերթական խախտման մասին
26-04-2023 13:01:09 | Հայաստան | Ի՞նչ է գրում մամուլը
Ազատություն. Հայաստանը ՄԱԿ-ի Արդարադատության միջազգային դատարանին ծանուցել է Ադրբեջանի կողմից հերթական խախտման՝ Հակարիի կամրջի փակման և Լաչինի միջանցքում անցակետի տեղադրման մասին, «Ազատությանը» փոխանցեց միջազգային իրավական հարցերով Հայաստանի Հանրապետության ներկայացուցիչ Եղիշե Կիրակոսյանը:
Կիրակոսյանի փոխանցմամբ՝ դեռ պետք է ստանան Ադրբեջանի պատասխանը, ինչից հետո կտեղեկացնի հետագա ընթացքի մասին, թե ինչ պահանջ է ձևակերպվելու և ինչպես պետք է այն քննության առնվի:
Ադրբեջանցիները կիրակի օրը փակել են Հայաստանն Արցախին կապող Հակարիի կամուրջը, որը Լաչինի միջանցքում է`ռուս խաղաղապահների վերահսկողության գոտում։ Բաքվում հայտարարել են, թե տեղում նոր անցակետ են տեղադրել, ինչի մասին տեղեկացրել են ռուս խաղաղապահների հրամանատարությանը և ռուս-թուրքական մոնիտորինգի կենտրոնին:
Հայկական կողմը հայտարարել էր, որ տվյալ հարցով դիմելու է ՄԱԿ-ի Արդարադատության միջազգային դատարան:
ՄԱԿ-ի դատարանը դեռ 2022 թվականի փետրվարի 22-ի վճռով Ադրբեջանին պարտավորեցրել է «ձեռնարկել իր տրամադրության տակ եղած բոլոր միջոցները՝ Լաչինի միջանցքով երկու ուղղություններով մարդկանց, մեքենաների և բեռների անարգել տեղաշարժն ապահովելու համար»։
ՀԱՅԵՐԵՆ
Русский
English
Դաս. հայերեն
French
