Ակտիվ հրետակոծության ինտենսիվությունը նվազել է Հայաստանի բանակի ադեկվատ և արդյունավետ պատասխան գործողություններից հետո. Փաշինյան
11-05-2023 11:53:18 | Հայաստան | Ի՞նչ է գրում մամուլը
1lurer. Այսօր՝ ժամը 06:00-ի սահմաններում, ադրբեջանական զինված ուժերի ստորաբաժանումները հրետանային զենքերից կրակ են բացել Գեղարքունիքի մարզի ուղղությամբ: Ակտիվ հրետակոծությունը նվազել է հայկական կողմի ադեկվատ պատասխանի արդյունքում: Կառավարության նիստի մեկնարկին այդ մասին հայտարարեց ՀՀ վարչապետ Նիկոլ Փաշինյանը:
«Ակտիվ հրետակոծության ինտենսիվությունը որոշակիորեն նվազել է Հայաստանի բանակի ադեկվատ և արդյունավետ պատասխան գործողություններից հետո»,- ասաց Փաշինյանը և հավելեց, որ ադրբեջանական այս գործողությունները սադրիչ են և նպատակ ունեն զրոյացնել այն առաջընթացը, որ գրանցվել է մայիսի 1-4-ը Վաշինգտոնում տեղի ունեցած բանակցությունների արդյունքում:
«Այսօրվա սադրանքը նպատակ ունի նաև խաթարել կիրակի օրը Բրյուսելում եռակողմ ֆորմատով, իսկ հունիսի 1-ին Քիշնևում հնգակողմ ֆորմատով նախատեսված բանակցությունները»,- ասել է վարչապետը:
Հիշեցնենք՝ այսօր՝ ժամը 06:00-ից, Ադրբեջանի ԶՈՒ ստորաբաժանումները հրետանային և ականանետային միջոցներից կրակ են բացել Սոթքի ուղղությամբ տեղակայված հայկական դիրքերի ուղղությամբ:
Ժամը 10:25-ի դրությամբ հայկական կողմն ունի 4 վիրավոր: Վիրավոր զինծառայողներից 2-ի վիճակը գնահատվում է բավարար, 2-ինը՝ միջին ծանրության: Վիրավորում ստացած զինծառայողների կյանքին այս պահի դրությամբ վտանգ չի սպառնում:
ՀԱՅԵՐԵՆ
Русский
English
Դաս. հայերեն
French
