2008թ.-ին Երեւանի պոլիկլինիկաներ բնակչության
այցելությունների թիվը 8,6%-ով աճել է
12-01-2009 19:00:00 | Հայաստան | Հասարակություն
ԵՐԵՎԱՆ, 12 ՀՈՒՆՎԱՐԻ, ՆՈՅՅԱՆ ՏԱՊԱՆ: 2008թ.-ին Երեւանի
պոլիկլինիկաներ բնակչության այցելություների թիվը կազմել է 2 մլն
93 հազար, ինչը նախորդ տարվա նույն ժամանակահատվածի համեմատ
8,6%-ով ավելին է: Այս մասին հունվարի 12-ի ասուլիսում հայտնեց
Երեւանի քաղաքապետարանի Առողջապահության եւ սոցիալական
ապահովության վարչության պետ Արմեն Սողոյանը:
Նրա խոսքերով, 2007թ.-ի համեմատ այցելությունների թիվը
ընտանեկան բժիշկների, տեղամասային թերապեւտների եւ մանկաբույժների
մոտ աճել է 7%-ով, նեղ մասնագետների մոտ` 10,5%-ով: Նույն
ժամանակահատվածում 14%-ով աճել է լաբորատոր գործիքային
հետազոտությունների թիվը: Ա.Սողոյանը նշեց նաեւ, որ 2008թ.-ին 151
116 քաղաքացիների տրամադրվել է անվճար դեղորայք, ինչը նախորդ տարվա
համեմատ ավելի է 14,2%-ով:
2008թ.-ին քաղաքապետարանի ենթակայության տակ գտնվող
կլինիկաներում բուժսպասարկում է ստացել 39 911 քաղաքացի, ինչը
նախորդ տարվա նույն ժամանակահատվածի համեմատ 25,2%-ով ավելի է:
Ա.Սողոյանի խոսքերով, 9%-ով ավելացել են շտապօգնության ծառայության
կանչերը, սակայն 13%-ով նվազել են ինֆեկցիոն հիվանդությունների հետ
կապված կանչերի թիվը:
Նշվեց նաեւ, որ 2008թ.-ին Երեւանի 10 ծննդատներում ծնվել է 16
994 երեխա, ինչը նախորդ տարվա համեմատ 8,9%-ով ավելի է: Ա.Սողոյանը
հայտնեց, որ հուլիսի 1-ից մինչեւ դեկտեմբերի 31-ը անվճար
ծննդօգնության պետական հավաստագիր են ստացել 7700 հղի կանայք:
Վարչության պետը տեղեկացրեց, որ ամբողջությամբ ավարտվել են
Համաշխարհային բանկի միջոցներով Երեւանի Սբ.Գրիգոր Լուսավորիչ եւ
Սբ.Աստվածամայր բժշկական կենտրոնների վերանորոգման աշխատանքները:
Գր.Լուսավորիչ կենտրոնում իրականացվել են 1 մլն 110 հազ. ԱՄՆ
դոլարի շինաշխատանքներ, տեղադրվել 1 մլն 632 հազ. դոլարի
ժամանակակից բժշկական սարքավորումներ: Իսկ Սբ.Աստվածամայր բժշկական
կենտրոնում կատարվել են 743 հազար դոլարի շինաշխատանքներ,
տեղադրվել` 1,9 մլն դոլարի սարքավորումներ:
Անդրադառնալով 2009թ.-ին կատարվելիք աշխատանքներին,
Ա.Սողոյանը հայտնեց, որ այս տարի նախատեսվում է «Շտապ օգնություն»
ՓԲԸ-ի ավտոպարկը համալրել նոր մեքենաներով, ժամանակակից
սարքավորումներով եւ կապի համակարգով: Նշվեց նաեւ, որ այս տարի մեծ
ուշադրություն է դարձվելու հիմնական մահացության պատճառ հանդիսացող
սրտանոթային, արյան շրջանառության համակարգի,
նորագոյացությունների, շնչառական եւ մարսողական հիվանդությունների
վաղ հայտնաբերմանն ու բուժմանը: