09-09-2023 17:22:26 | Արցախ (ԼՂՀ) | Մամլո հաղորդագրություն
Այսօր՝ սեպտեմբերի 9-ին, ժամը 11-ից մեկնարկել էր ԼՂ Ազգային ժողովի հատուկ նիստը՝ նախագահ ընտրելու հարցով։
Փակ գաղտնի քվեարկությանը մասնակցել է 23 պատգամավոր, որոնցից 22-ը քվեարկել է կողմ, իսկ 1-ը՝ դեմ։
Քվեարկության արդյունքում ԼՂ ԱԺ-ն որոշել է Սամվել Սերգեյի Շահրամանյանին ընտրել նախագահ։
Ավելի վաղ հայտնել էինք, որ ԼՂ նախագահի պաշտոնում առաջադրված Սամվել Բաբայանի թեկնածությունը մերժվել էր: Նախագահի պաշտոնի միակ հավակնորդը Սամվել Շահրամանյանն էր:
Հիշեցնենք, ԼՂ ԱԱԾ-ն երեկ՝ սեպտեմբերի 8-ին, հաղորդագրություն էր տարածել և տեղեկացրել, որ սեպտեմբերի 9-ին ԼՂ նախագահի ընտրություններով պայմանավորված, հանրապետությունում ստեղծվել է ներքաղաքական լարված իրադրություն:
«Սահմանադրական կարգի տապալմանն ուղղված սպառնալիքների դեպքում ազգային անվտանգության ծառայությունը պատրաստ է վճռական գործողությունների։
Երկիրը ցնցումների տանելու հայտարարություններ անող քաղաքական ուժերի ներկայացուցիչներին ու առանձին անձանց կոչ ենք անում սթափվել և Արցախի Հանրապետության համար այս վճռորոշ ու օրհասական պահին վտանգի տակ չդնել մեր պետականությունը»,- մասնավորապես ասված էր հաղորդագրության մեջ։