ԵՐԵՎԱՆ, 25 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Հունաստանի Արտաքին
գործերի նախարարության «Hellinic Aid» բաժնի ֆինանսավորմամբ ՀՀ
Գյուղատնտեսության նախարարության Հանրապետական անասնաբուժական
ախտորոշիչ կենտրոնում նոյեմբերի 25-ին բացվեց սննդամթերքում
պեստիցիդների (թունաքիմիկատների) ստուգման լաբորատորիա:
Լաբորատորիան, որի բացմանը ներկա էին ՀՀ վարչապետ Տիգրան Սարգսյանը
եւ գյուղատնտեսության նախարար Արամայիս Գրիգորյանը, ստեղծվել է
Հունաստանի Հայ Դատի հանձնախմբի նախաձեռնությամբ: Ժամանակակից
սարքավորմուներով հագեցած լաբորատորիայի համար հունական
կառավարությունը հատկացրել է 230 հազար եվրո:
Տ.Սարգսյանի խոսքերով, լաբորատորիան հնարավորություն կտա
գյուղնախարարությանը հանրությանը տրամադրել տեղեկատվություն այն
մասին, որ թե Հայաստանում աճեցված որ պտուղ-բանջարեղենում
առողջության համար վնասակար նյութեր չեն պարունակվում: Նա նշեց, որ
մինչ օրս նման հագեցվածության լաբորատորիա հանրապետությունում չի
եղել, որպեսզի հնարավոր լիներ պարզել, թե պտուղների մշակման
ժամանակ օգտագործվող քիմիական նյութերը հետագայում ինչ
ազդեցություն են թողնում օգտագործողների վրա: Ըստ Տ.Սարգսյանի, այս
նախաձեռնությունը շատ կարեւոր է, քանի որ 2009թ.-ին նախատեսվում է
հանրապետությունում ավելացնել գյուղատնտեսության տեսակարար կշիռը`
ինչպես ՀՆԱ-ում, այնպես էլ սպառման ապրանքների ծավալներում:
Աթենքի Գյուղատնտեսական համալսարանի պրոֆեսոր Սերգո
Հարությունյանը ընդգծեց, որ այս լաբորատորիան հնարավորություն կտա
ստուգման ենթարկել ինչպես Հայաստանում արտադրված, այնպես էլ
ներկրվող սննդամթերքն ու գյուղմթերքները: «Այս լաբորատորիայում
կստուգվի սննդամթերքում պարունակվող մոտ 100 թունաքիմիկատների
չափաբաժինը: Եթե դրանց քանակությունը նորմայից ավելի լինի, ապա
կարգելվի տվյալ սննդամթերքի կամ գյուղմթերքի վաճառքը շուկայում»,-
ասաց Ս.Հարությունյանը: Նա միաժամանակ նշեց, որ Հայաստանից
արտահանվող մթերքը լաբորտաորիայում փորձաքննության ենթարկվելուց
հետո կստանա եվրոպական ստանդարտներին համապատասխանող սերտիֆիկատ:
Ս.Հարությունյանը տեղեկացրեց նաեւ, որ ծրագիրը շարունակական
կլինի, եւ հունական կառավարության ֆինանսավորմամբ 2009թ.-ին
Երեւանում կբացվի տարբեր խմիչքների հետազոտման լաբորատորիա, ինչպես
նաեւ կենդանիների կերի պատրաստման գործարան: