ՀԱՅԵՐԵՆ
Ուկրաինան ստացել է ամերիկյան Patriot հակաօդային պաշտպանության համակարգերի լրացուցիչ հրթիռներ, ֆրանսիական Crotale հրթիռային համակարգեր և ամերիկյան AIM հրթիռներ: Բացի այդ, գործընկերները կտրամադրեն նպատակային աջակցության փաթեթներ Ուկրաինայի շրջաններին, էներգետիկ համակարգին և անօդաչու թռչող սարքերի արտադրությանը։
«Արմենպրես»-ի փոխանցմամբ՝ այս մասին հայտարարել է Ուկրաինայի նախագահ Վոլոդիմիր Զելենսկին Կիևում Էստոնիայի նախագահ Ալար Կարիսի հետ հանդիպման ժամանակ։Զելենսկու խոսքով՝ օգոստոսի 24-ին Կիևում «Կամեցողների կոալիցիայի» գագաթնաժողովի ժամանակ կարևոր պայմանավորվածություններ են ձեռք բերվել Ուկրաինայի օդային տարածքի պաշտպանության վերաբերյալ։«Մենք ստացել ենք հաստատում մի քանի Crotale հակաօդային պաշտպանության համակարգի և դրանց համար նախատեսված հրթիռների փոխանցման մասին, չեմ ասի, թե որ երկրից:
Մենք նաև ստացել ենք AIM հրթիռներ: Սրանք մեզ համար շատ կարևոր հրթիռներ են. մենք դրանք օգտագործում ենք թշնամու հրթիռները խոցելու համար», - Զելենսկու խոսքերն է մեջբերում «ՌԲԿ-Ուկրաինա» պարբերականը։Ուկրաինայի նախագահը նաև հաստատել է ամերիկյան Patriot հակաօդային պաշտպանության համակարգերի համար լրացուցիչ զինամթերքի խմբաքանակի ստացումը։«Եվ, անկեղծ ասած, նույնպես չեմ ասի, թե որ երկրից, Patriot-ի համար ևս մի քանի հրթիռ է եկել:
Չեմ կարող ասել, թե քանիսը, բայց մի քանիսը: Մեզ ավելին է հարկավոր», - նշել է Զելենսկին։
«ՌԲԿ-Ուկրաինա»-ն նշում է, որ բացի օդային պաշտպանության ամրապնդումից, գագաթնաժողովից հետո Կիևի գործընկերները հայտարարել են որոշակի տարածաշրջանների և տնտեսական ոլորտների համար աջակցության նոր փաթեթների մասին։«Մենք աջակցություն ենք ստացել Բելգիայից, Դանիայից՝ Նիկոլաևի ուղղությամբ։
Էստոնիան աջակցում է Ժիտոմիրին», - ասել է Զելենսկին։Նրա խոսքով՝ «Կամեցողների կոալիցիայի» անդամները նաև աջակցել են վետերանների հետ կապված մի քանի նախագծի, իսկ Բելգիան և Գերմանիան առանձին հայտարարել են Ուկրաինայի համար էներգետիկ փաթեթների մասին։ Շվեդիան էլ, Զելենսկու խոսքով, զգալի ֆինանսավորման փաթեթ է տրամադրում ուկրաինական անօդաչու թռչող սարքերի արտադրության համար։
Բացի այդ, օգոստոսի 24-ին Բրիտանիայի կառավարությունը MBDA պաշտպանական ընկերությանը թույլ է տվել գաղտնազերծել բրիտանա-ֆրանսիական արտադրության Storm Shadow/SCALP հեռահար հրթիռների բաղադրիչների վերաբերյալ տեղեկատվությունը, որը թույլ կտա դրանք արտադրել հենց Ուկրաինայի տարածքում:
