ԻՍԼԱՄԱԲԱԴ, 29 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Պակիստանի հարավ-արեւմուտքում` Բելուջիստան նահանգում, տեղի ունեցած երկրաշարժի զոհերի թիվը հասել է մոտ 150 մարդու: Մարմնական տարբեր աստիճանի վնասվածքներ է ստացել մոտ հազար մարդ: Ավելի քան 15 հազար մարդ մնացել է անօթեւան եւ խուճապահար լքում է աղետի շրջանը: Զոհերի թիվը շարունակում է աճել, քանի որ շատ մարդիկ նախկինի պես գտնվում են փլատակներում` առանց հացի ու ջրի: Դրանից բացի, փրկարարական աշխատանքների ընթացքը դժվարացել է վատթարացած եղանակային պայմանների պատճառով. աղետի գոտում անձրեւ է սկսվել: Երկյուղ կա, որ աղետի շրջանում կվատթարանա սանիտարա-համաճարակաբանական իրավիճակը, քանի որ նկատվում է խմելու ջրի եւ դեղամիջոցների պակաս:

---