ԼՈՆԴՈՆ, 26 ՕԳՈՍՏՈՍԻ, ՆՈՅՅԱՆ ՏԱՊԱՆ: Ռուսաստանը մտադիր է
կասեցնել ՆԱՏՕ-ի հետ համաձայնությունը, որ թույլ է տալիս
Հյուսիսատլանտյան դաշինքին Ռուսաստանի եւ Միջին Ասիայի
պետությունների միջոցով անհրաժեշտ սարքավորում փոխադրել տարանցմամբ
Աֆղանստան: Այս մասին հաղորդել է բրիտանական «Թայմս» թերթը`
վկայակոչելով Աֆղանստանում Ռուսաստանի դեսպանին:
Աֆղանստանում Ռուսաստանի դեսպան Զամիր Քաբուլովը հայտարարել
է, որ, իր կարծիքով, պայմանագիրը կորցրել է ուժը, քանի որ
Ռուսաստանը անցած շաբաթ օս-վրացական հակամարտության առնչությամբ
դիրքորոշումների անհամապատասխանության պատճառով կասեցրել է
ռազմական համագործակցությունը ՆԱՏՕ-ի հետ:
Բեռների Աֆղանստան տարանցման մասին պայմանագիրը կնքվել է
ապրիլին ՆԱՏՕ-ի գագաթնաժողովում: Նրա գլխավոր նպատակն է
տրանսպորտային գիծ ապահովել, որը կարող էր այլընտրանք դառնալ
Աֆղանստանի եւ Պակիստանի սահմանի միջեւ երթուղուն, որը հաճախ է
ենթարկվում գրոհայինների հարձակումներին երկու կողմերից: