ՀՆԴԿԱՍՏԱՆՈՒՄ ՊԱՅԹՅՈՒՆՆԵՐԻ ՀԵՏԵՎԱՆՔՈՎ 38 ՄԱՐԴ Է ԶՈՀՎԵԼ
28-07-2008 14:02:00 | Հնդկաստան | Միջազգային
ԴԵԼԻ, 28 ՀՈՒԼԻՍԻ, ՆՈՅՅԱՆ ՏԱՊԱՆ: Հնդկաստանի Ահմեդաբադ
քաղաքում հուլիսի 26-ի գիշերը տեղի ունեցած մի շարք պայթյունների
հետեւանքով զոհվածների թիվը հասել է 38 մարդու: Մարմնական տարբեր
աստիճանի վնասվածքներ է ստացել մոտ հարյուր մարդ, հաղորդում են
տեղի ԶԼՄ-ները:
Վերջին տվյալների համաձայն, 70 րոպեների ընթացքում գործարկվել
է 16 պայթուցիկ սարք: Պայթյունները որոտացել են երկրի արեւմուտքում
գտնվող Գուջարաթ նահանգի խոշորագույն քաղաքի ամենամարդաշատ
վայրերում, այդ թվում` առեւտրական փողոցների եւ կինոթատրոնների,
ինչպես նաեւ երեք հիվանդանոցների մերձակայքում: Զոհերի թիվը կարող
է աճել, քանի որ, ըստ բժիշկների եզրակացության, որոշ տուժածների
վիճակը շարունակում է մնալ ծանր:
Պայթյունների պատասխանատվությունը ստանձնել է «Հնդիկ
մոջահեդներ» կոչվող խմբավորումը: