ՀԱՅԱՍՏԱՆՈՒՄ 2007 Թ.-ԻՆ ԹԵԹԵՎ ԱՐԴՅՈՒՆԱԲԵՐՈՒԹՅԱՆ ԱՐՏԱԴՐԱՆՔԻ
ԾԱՎԱԼԸ ՆԱԽՈՐԴ ՏԱՐՎԱ ՀԱՄԵՄԱՏ ՄՈՏ 15%-ՈՎ ՆՎԱԶԵԼ Է
30-04-2008 20:00:00 | Հայաստան | Տնտեսություն
ԵՐԵՎԱՆ, 30 ԱՊՐԻԼԻ, ՆՈՅՅԱՆ ՏԱՊԱՆ: ՀՀ Էկոնոմիկայի
նախարարության կողմից 2007թ.-ին մոնիտորինգի ենթարկված թեթեւ
արդյունաբերության 32 ընկերությունները 2006թ.-ի 9,5 մլրդ դրամի
դիմաց անցած տարի թողարկել են 8,1 մլրդ դրամի (ավելի քան 3,2 մլն
ԱՄՆ դոլար) արտադրանք կամ 15%-ով պակաս: Ինչպես «ՆՈՅՅԱՆ ՏԱՊԱՆ»-ի
թղթակցին հայտնեց նախարարության Ճյուղային եւ տարածքային տնտեսական
զարգացման վարչության Տարածքային տնտեսական զարգացման բաժնի պետ
Արմեն Եգանյանը, դա հիմնականում պայմանավորված է այն հանգամանքով,
որ ճյուղը հիմնականում աշխատում է «ժամանակավոր ներմուծում
վերամշակման համար» մաքսային ռեժիմով եւ արտադրության ծավալները
կախված են արտաքին պատվերներից: Նա նշեց, որ 2007թ.-ին այդ
ձեռնարկությունների արտադրանքի իրացումը կազմել է 8,2 մլրդ դրամ
(2006թ.-ին` 9,3 մլրդ դրամ), իսկ արտահանումը` 5,9 մլրդ դրամ
(2006թ.-ին` 7,3 մլրդ դրամ):
Ըստ Ա.Եգանյանի, թեթեւ արդյունաբերության ճյուղի բնականոն
աշխատանքն ապահովվում է «Հայաս գրուպ» կարի ֆաբրիկայի, «Արշալույս»
ԲԲԸ-ի, կոշիկի «Լյուքս» ֆաբրիկայի եւ մի շարք այլ խոշոր
ձեռնարկությունների շնորհիվ: Ըստ նրա, տեղական արտադրանքը
հիմնականում մրցունակ է միջազգային շուկայում, եւ նախարարության
քաղաքականության ուղղություններից մեկն է նպաստել արտահանման
ծավալների աճին:
Ա.Եգանյանը հայտնեց նաեւ, որ նախարարության կողմից մշակված
ձեռագործ գորգագործությանն աջակցելու եռամյա պետական ծրագրի
նախագծով, մասնավորապես, նախատեսվում է գործող ձեռնարկություններին
տրամադրել ֆինանսական աջակցություն, օժանդակել արտադրանքի
արտահանմանը, կազմակերպել գովազդը եւ ցուցահանդեսներ:
Ա.Եգանյանը նշեց, որ անհրաժեշտ է պահպանել ձեռագործ
գորգագործության զարգացման տեմպերը, նպաստել այս ոլորտում
արտասահմանցի ձեռներեցների ներդրումներին: Նշվեց նաեւ, որ
հանրապետությունում ներկայումս գործում է ձեռագործ գորգագործության
մոտ 10 ձեռնարկություն: