ԲՐԻՏԱՆԱԿԱՆ ՇՈՒԿԱՅՈՒՄ ՍԿՍՎԵԼ Է ՀԱՅԱՍՏԱՆ-ՎՐԱՍՏԱՆ-ԹՈՒՐՔԻԱ
ՏԱՐԱԾԱՇՐՋԱՆԱՅԻՆ ՏՈՒՐՓԱԹԵԹՆԵՐԻ ԻՐԱՑՈՒՄԸ
29-04-2008 20:00:00 | Հայաստան | Տնտեսություն
ԵՐԵՎԱՆ, 29 ԱՊՐԻԼԻ, ՆՈՅՅԱՆ ՏԱՊԱՆ: Բրիտանական
տուրօպերատորներից մեկն արդեն սկսել է Հայաստան-Վրաստան-Թուրքիա
երթուղով տուրփաթեթների իրացումը: Այս մասին «ՆՏ»-ի թղթակցին
հայտնեց ԱՄՆ Միջազգային զարգացման գործակալության կողմից
իրականացվող «Մրցունակ մասնավոր հատված Հայաստանում» ծրագրի
մրցունակության ավագ փորձագետ Ալան Սաֆերին:
Նրա խոսքերով, բրիտանացի զբոսաշրջիկները հետաքրքրված են
Հայաստան-Վրաստան տարածաշրջանային տուրփաթեթներով Հայաստան
այցելություններով, ինչը պայմանավորված է երկրների միջեւ
ավիաչվերթների կարճ` ընդամենը 5 ժամ, տեւողությամբ: Նրա խոսքերով,
Հայաստանի ներառմամբ տարածրջանային տուրփաթեթեների ձեռքբերմամբ
կարող են հետաքրքրված լինել նաեւ ճապոնացի զբոսաշրջիկները:
Նշվեց, որ բացի Վրաստանից, տարածաշրջանի այլ երկրների եւ
Հայաստանի ներառմամբ տարածաշրջանային տուրփաթեթների միջազգային
շուկայում իրացումը կապված է քաղաքական խնդիրների լուծման հետ:
Օրինակ, ամերիկյան շուկայում խնդրահարույց է Իրան-Հայաստան
զուգորդմամբ տուրփաթեթների իրացումը:
Ծրագրի զբոսաշրջային մարքեթինգի եւ հաղորդակցման խորհրդատու
Նադյա Պասկուալի գնահատմամբ, տուրփաթեթներով Իտալիայից Հայաստան
այցելող զբոսաշրջիկների 20-30%-ը երկիր է ուղեւորվում
Հայաստան-Վրաստան տարածաշրջանային տուրփաթեթներով: Նրանց
տուրփաթեթների տեւողությունը 13-14 օր է, իսկ միայն Հայաստան
այցելողներինը` 8-9 օր: Նրա խոսքերով, Հայաստանի եւ Վրաստանի
տուրօպերատորները համագործակցում են մի քանի տարածաշրջանային
տուրփաթեթների կազմակերպման ուղղությամբ, եւ նման համակցված
ուղեւորությունների ժամանակ զբոսավարների հետ կապված խնդիրներ չեն
առաջանում: Նշվեց, որ միջազգային շուկաներում տարածաշրջանային
տուրփաթեների իրացումը խթանելու նպատակով, մասնավորապես, Հայաստանի
եւ Վրաստանի տուրօպերատոները պետք է համատեղ ջանքեր գործադրեն
մարքեթինգային աշխատանքները ակտիվացնելու ուղղությամբ: