ՀԱՅԱՍՏԱՆԻ ԳՐՈՂՆԵՐԻ ՄԻՈՒԹՅՈՒՆՈՒՄ ԿԱՅԱՑԱՎ ԿԱՐԻՆԵ ԱՇՈՒՂՅԱՆԻ
«ՓՈՐՁԵՐ» ԺՈՂՈՎԱԾՈՒԻ ՇՆՈՐՀԱՆԴԵՍԸ
28-03-2008 18:15:00 | Հայաստան | Մշակույթ
ԵՐԵՎԱՆ, 28 ՄԱՐՏԻ, ՆՈՅՅԱՆ ՏԱՊԱՆ: Հայաստանի Գրողների
միությունում (ՀԳՄ) մարտի 28-ին կայացավ գրող, թարգմանիչ Կարինե
Աշուղյանի «Փորձեր» ժողովածուի շնորհանդեսը: Գրքում զետեղված են ոչ
միայն նրա պատմվածքներն ու հոդվածները, այլեւ աշխարհահռչակ
գրողների գործերի թարգմանությունները:
ՀԳՄ նախագահի Լեւոն Անանյանի խոսքերով, «Փորձեր» ժողովածուն
նոր խոսք է հայ գրականությունում: «Կ.Աշուղյանը իր
ստեղծագործություններով փորձում է հասնել իր սիրելի գրողներին,
նաեւ փորձում է իր թարգմանությունների շնորհիվ հայ ընթերցողին
ներկայացնել համաշխարհային գրականության գլուխգործոցները»,- նշեց
Լ.Անանյանը:
«Գրելն ինձ համար շնչելու նման մի բան է, որից խուսափելն
անհնար է»,- ասաց Կ.Աշուղյանը` հավելելով, որ իր հաջորդ գիրքը
անվանվելու է «Մարտի 1»` նվիրված ՀՀ նախագահական ընտրություններից
հետո տեղի ունեցած իրադարձություններին: