ԼԱՏՎԻԱՅԻ ԻՇԽԱՆՈՒԹՅՈՒՆՆԵՐԸ ՌՈՒՍ ՆԱԽԿԻՆ ՊԱՐՏԻԶԱՆԻՆ 30 ՀԱԶԱՐ
ԵՎՐՈ ՓՈԽՀԱՏՈՒՑՈՒՄ ԿՎՃԱՐԵՆ
24-07-2008 17:55:00 | Ֆրանսիա | Միջազգային
ՍՏՐԱՍԲՈՒՐԳ, 24 ՀՈՒԼԻՍԻ, ՆՈՅՅԱՆ ՏԱՊԱՆ: Մարդու իրավունքների
եվրոպական դատարանը հինգշաբթի նախկին պարտիզան Վասիլի Կոնոնովի
գործով վճիռ է կայացրել: Դատարանը որոշել է բավարարել վետերանի
հայցադիմումը, ինչպես նաեւ լատվիական իշխանություններին
պարտավորեցրել Կոնոնովին 30 հազար եվրոյի փոխհատուցում վճարել:
85-ամյա վետերանը Լատվիայի ղեկավարությանը մեղադրում էր իր
նկատմամբ անօրինական դատավճիռ արձակելու մեջ: Լատվիայում Կոնոնովին
դատել են երկու անգամ: 1998 թվականին հիշել են ավելի քան կես դար
վաղեմության պատմություն, երբ պատերազմի վերջին Կոնոնովը ղեկավարել
է ռազմական մի գործողություն, որի ընթացքում ոչնչացվել են մի քանի
«պոլիցայներ»: Վետերանի նկատմամբ վճիռ է կայացվել: Սակայն, քանի որ
քննության ժամանակ նա արդեն նստել էր դատարանի սահմանած ժամկետը,
Վասիլի Կոնոնովին ազատ են արձակել:
Սակայն որոշ ժամանակ անց թոշակառուի նկատմամբ հետապնդումները
վերսկսվել են: Նորից դատ է եղել, եւ դատավճիռ` վեց տարվա
բանտարկություն: Եվ նորից նախկին պարտիզանին ազատ են թողել` այս
անգամ առողջական վիճակի պատճառով: Դրանից հետո վետերանը, որն
ընդունել է Ռուսաստանի քաղաքացիություն, հայց էր ներկայացրել
Եվրոպական դատարան: