ՀԱՅԱՍՏԱՆՈՒՄ ՄԱՐԴԿԱՅԻՆ ԿԱՊԻՏԱԼԻ ՈԼՈՐՏՈՒՄ ԱՆՀՐԱԺԵՇՏ Է ԿԱՏԱՐԵԼ
ՌԱԴԻԿԱԼ ՔԱՅԼԵՐ,- ԳՏՆՈՒՄ ԵՆ ԳՈՐԾԱՐԱՐԱԿԱՆ ՇՐՋԱՆԱԿՆԵՐԸ
17-07-2008 20:00:00 | Հայաստան | Տնտեսություն
ԵՐԵՎԱՆ, 17 ՀՈՒԼԻՍԻ, ՆՈՅՅԱՆ ՏԱՊԱՆ: Հայաստանը մարդկային
կապիտալի մի շարք ցուցանիշներով աշխարհում զբաղեցնում է «բավականին
ստորին հորիզոնականներ», այս ոլորտում անհրաժեշտ է կատարել ռադիկալ
քայլեր,- Տնտեսական լրագրողների ընկերակցության հուլիսի 16-ի
կազմակերպած «կլոր սեղանի» ընթացքում նշեց «Ռադվան տեխնոլոգիաներ»
ընկերության փորձագետ Դավիթ Հախվերդյանը: Ըստ նրա, այդ մասին է
վկայում մի շարք կարեւոր ցուցանիշներով Հայաստանի զբաղեցրած տեղը.
մասնավորապես, կառավարության համար տեղեկատվական տեխնոլոգիաների
գերակայության հարցով Հայաստանը զբաղեցնում է 64-րդ տեղը,
գիտահետազոտական ոլորտին կառավարության սուբսիդիավորման հարցով`
58-րդ տեղը, աշխատողների վերապատրաստման աստիճանի հարցով` 89-րդ
տեղը, ընկերությունների գիտահետազոտական ծախսերի մասով` 90-րդ
տեղը, բուհ-տնտեսություն տնտեսական համագործակցության հարցով`
82-րդ տեղը:
Համաշխարհային տնտեսական ֆորումի տվյալներով, Հայաստանում 1
մլն մարդու հաշվով հետազոտողների թիվը կազմում է 1605, այն
դեպքում, երբ, օրինակ, Թայվանում այն կազմում է 3188,
վերապատրաստված բարձր որակավորում ունեցող մասնագետների թիվը
ընդհանուրի մեջ կազմում է ընդամենը 16,5 տոկոս, հետոզոտությունների
եւ մշակումների վրա կատարված ծախսերը ՀՆԱ-ում 0,25 տոկոս են
կազմում: Թայվանում այդ ծախսերը կազմում են 4,3 տոկոս, իսկ
1960-90թթ. մոտ 100 հազար թայվանցիներ վերապատրաստվել են ԱՄՆ-ում
եւ բոլորը` չնչին բացառություններով վերադարձել են իրենց հայրենիք:
Դ.Հախվերդյանը նշեց, որ Հայաստանում տեղեկատվական տեխնոլոգիաների
արտադրության ծավալը կազմում է շուրջ 84 մլն ԱՄՆ դոլար, որից 60
մլն. ԱՄՆ դոլարի արտադրանքը արտահանվում է, ոլորտում ընդգրկված է
մոտ 5000 մասնագետ` զբաղվածների մոտ 0,6 տոկոսը, ոլորտում
արտադրվում է ՀՆԱ-ի 2 տոկոսը:
Փորձագետը հիշեցրեց, որ Հայաստանի գլխավոր մրցակցային
առավելություններից մեկը ճանաչվել է մարդկային ներուժը,
մասնավորապես, այսպիսի եզրահանգման է եկել Հարվարդի համալսարանի
պրոֆեսոր Մայքլ Պորտերը, որը 2004թ. կատարել է Հայաստանի
մրցակցային առավելությունների վերլուծություն: Սակայն աշխատուժը
մրցակցային առավելություն դարձնելու համար անհրաժեշտ է ներդրումներ
կատարել մարդկային կապիտալում,- նշեց փորձագետը: Նա ընդգծեց, որ
պետք չէ ամեն ինչը բարդել պետության վրա, որովհետեւ ինովացիոն
կապիտալը եւ մարդկային կապիտալում ներդրումները առավել շատ բիզնես
միջավայրի ներկայացուցիչները պետք է անեն, իսկ պետությունը պետք է
ֆինանսավորի առավել ռիսկային եւ ստրատեգիական նշանակության
նախագծերը: Նա ամենակարեւոր քայլերից մեկը համարում է
գյուտարարների եւ բիզնես շրջանակների միջեւ համագործակցության
զարգացումը, այդ բացի մասին է վկայում այն, որ 2007թ. Միգրացիոն
գործակալության հաշվետվության համաձայն, Հայաստանում գրանցվել է
882 գյուտ, սակայն որեւէ ինֆորմացիա չկա, թե դրանցից քանիսն է
ապրանք դարձել, մտել բիզնես միջավայր: Փորձագետը կարեւորեց նաեւ
բուհ-ձեռնարկատերեր կապի ստեղծումը:
ՀՀ էկոնոմիկայի փոխնախարար Վահրամ Ղուշչյանն իր հերթին նշեց,
որ կառավարությունը արդեն իսկ սկսել է իրականացնել ներդրումային եւ
գործարար միջավայրի բարելավման իր ծրագրերը, հաստատվել է
միջոցառումների ցանկը եւ ժամանակացույցը` ուղղված բոլոր
ընթացակարգերի, վարչարարության պարզեցմանը, Հայաստանում բիզնես
սկսելու գործընթացը հեշտացնելուն: «Հայաստանը բիզնեսով զբաղվելու
տեսանկյունից աշխարհում պետք է լինի աշխարհի լավագույն երկրների 10
տոկոսի մեջ»,- այսպիսի նպատակ է դրել կառավարությունը:
«Կառավարությունը պատրաստ է մինչեւ 1 տոկոս ծախսել ներդրումների
վրա, եթե մենք կարողանանք մասնավոր հատվածի կողմից եւս ներգրավել
1-2 տոկոս»,- ասաց կառավարության ներկայացուցիչը:
«Կլոր սեղանի» ընթացքում «Ռադվան տեխնոլոգիա» ընկերության
նախագահ Ռադիկ Վանունցը հայտնեց, որ ընկերությունը նախաձեռնել է
Հայաստանում առաջին փորձերից մեկը` ներդրում է կատարում մարդկային
կապիտալի ոլորտում: Հայտարարված է ներդրումային նախագծերի մրցույթ,
որը պետք է անցկացվի սեպտեմբերի 25-30-ը, մրցույթը նպատակ ունի
բացահայտել ներդրումային նախագծերի մշակման բնագավառում առկա
մասնագիտական ներուժը: Լավագույն երեք ներդրումային նախագծերի
հեղինակները համապատասխանաբար 1,5 մլն, 800 եւ 600 հազար դրամ
պարգեւավճար կստանան, պարգեւավճարները կտրվեն ընկերության հետ
աշխատանքային պայմանագրերը կնքելուց հետո:
2004թ. ստեղծված «Ռադվան տեխնոլոգիա» ընկերության կողմից
վերջին տարիներին բարձր տեխնոլոգիաների բնագավառում կատարած
հետազոտությունները հնարավոր են դարձրել նրանց կիրառումը
արտադրության մեջ, մասնավորապես, ռազմական նշանակության
վարժասարքերի ոլորտում: Ընկերությունը զբաղվում է փոքր ՀԷԿ-երի
կառուցման եւ վերակառուցման հարցերով: Ընկերության կողմից
հիմնադրվել է նաեւ բիզնեսի կառավարման ոլորտի կադրերի
վերապատրաստմանն ուղղված «Աղանբեկյանի անվան կորպորատիվ կառավարման
բարձրագույն դպրոցը»: