2008 Թ.-Ի ՀՈՒՆՎԱՐ-ՄԱՐՏԻՆ ՀԱՅԱՍՏԱՆԻ ՏՆՏԵՍՈՒԹՅԱՆ ԻՐԱԿԱՆ
ՀԱՏՎԱԾ ԱՄԵՆԱՄԵԾ ԾԱՎԱԼՈՎ ՆԵՐԴՐՈՒՄՆԵՐ ԵՆ ԿԱՏԱՐԵԼ ՌՈՒՍԱՍՏԱՆԸ ԵՎ
ԱՐԳԵՆՏԻՆԱՆ
09-06-2008 18:46:00 | Հայաստան | Տնտեսություն
ԵՐԵՎԱՆ, 9 ՀՈՒՆԻՍԻ, ՆՈՅՅԱՆ ՏԱՊԱՆ: 2008թ.-ի հունվար-մարտին
Հայաստանի տնտեսության իրական հատվածում կատարված օտարերկյա
ներդրումների ընդհանուր ծավալում առաջատարը Ռուսաստանն է` 109 մլն
187,7 հազ. ԱՄՆ դոլար ծավալով, ինչը նախորդ տարվա նույն
ժամանակահատվածի ցուցանիշը գերազանցում է 3,3 անգամ:
ՀՀ Ազգային վիճակագրական ծառայության տվյալներով, արգենտինյան
ներդրումների ծավալն այս տարվա առաջին երեք ամիսներին կազմել է 15
մլն 345,2 հազ. դոլար` 2007թ.-ի հունվար-մարտի համեմատ աճելով
90,2%-ով:
Հայաստանի տնտեսության իրական հատվածում մյուս խոշոր
ներդրողներն են Կիպրոսը` 1 մլն 762,8 հազ. դոլար (նվազել է
70,1%-ով), Ֆրանսիան` շուրջ 4 մլն 957,7 հազ. դոլար (նվազումը`
5,9%), ԱՄՆ-ը` շուրջ 10 մլն 139,3 հազ. դոլար (աճել է 2,1 անգամ),
Գերմանիան` 6 մլն 816,3 հազ. դոլար (աճել է 90,6%-ով),
Լյուքսեմբուրգը` 4 մլն 276 հազ. դոլար (աճը` 7,5 անգամ),
Լիխտենշտեյնը` 9 մլն դոլար (2007թ.-ի առաջին երեք ամիսներին այդ
երկրից ներդրումներ չեն եղել) Ավստրալիան` 2 մլն 799,9 հազ. դոլար
(2007թ.-ի առաջին երեք ամիսներին այդ երկրից ներդրումներ չեն
եղել):
Ռուսաստանի ներդրումները կապի ոլորտում կազմել են 70 մլն
853,2 հազ. դոլար, մետաղագործական արդյունաբերությունում` 7 մլն
391,9 հազ. դոլար, էլեկտրաէներգիայի, գազի, տաք ջրի եւ գոլորշու
արտադրության ու բաշխման ոլորտում` 25 մլն 89,3 հազ. դոլար,
սպառողներին այլ տեսակի ծառայությունների մատուցման ոլորտում ` 2
մլն 645 հազ. դոլար, հանգստի կազմակերպման ոլորտում` 1 մլն 396
հազ. դոլար, անհատական ծառայությունների մատուցման ոլորտում` 1 մլն
60,5 հազ. դոլար:
Հայաստանում Արգենտինայի կատարած ներդրումներից 13 մլն 996,4
հազ. դոլարը կատարվել է օդային տրանսպորտի, իսկ 1 մլն 357,8 հազ.
դոլարը` օժանդակ եւ լրացուցիչ տրանսպորտային գործունեության
ոլորտներում: Կիպրոսը 1 մլն 679,1 հազ. դոլարի ներդրում է կատարել
հանքագործական արդյունաբերությունում: Ֆրանսիական 4 մլն 957 հազ.
դոլար ներդրումներն ամբողջությամբ ուղղվել են սննդամթերքի,
ներառյալ` խմիչքների, արտադրության ոլորտ:
ԱՄՆ-ի ներդրումներից 4 մլն 620,2 հազ. դոլարն ուղղվել է
հաշվողական տեխնիկայի հետ կապված գործունեության, 1 մլն 640 հազ.
դոլարը` հետազոտությունների եւ մշակումների, 3 մլն 126,3 հազ.
դոլարը` հյուրանոցների եւ ռեստորանների կողմից ծառայությունների
մատուցման ոլորտներ:
Գերմանիայի կատարած 6 մլն 816,3 հազ. դոլար ներդրումներն
ամբողջությամբ ուղղվել են Հայաստանի հանքագործական
արդյունաբերություն, իսկ ավստրալիական 2 մլն 799,9 հազ. դոլար
ներդրումներն ամբողջությամբ կատարվել են մետաղի հանքաքարի
արդյունահանման ոլորտում: Լյուքսեմբուրգի կատարած 4 մլն 276 հազ.
դոլար ներդրումներն ամբողջությամբ ուղղվել են սննդամթերքի,
ներառյալ` խմիչքների, արտադրության ոլորտ, իսկ Լիխտենշտեյնի 9 մլն
դոլար ներդրումները` մետաղագործական արդյունաբերություն: