ՊԵԿԻՆ, 19 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Կառուցվող շենքի 33-րդ
հարկից ընկած 58 տարեկան չինացի բանվորը կարողացել է ողջ մնալ: Դա
պատահել է հյուսիս-արեւելյան չինական Լյաոնին նահանգի Դալյան
քաղաքում, գրում է տեղի «Դալյան վանբաո» թերթը:
Վան ազգանունով բանվորի բախտը, կարելի է ասել, բերել է: Նա
ընկել է շինարարական ոլորված լարերի կույտի վրա, որը, զսպանակելով,
որոշակի չափով մեղմել է սարսափելի հարվածը: Կոտրված կողոսկրերով եւ
ներքին օրգանների վնասվածքներով Վանը փոխադրվել է մոտակա
հիվանդանոցի ինտենսիվ թերապիայի բաժանմունք: Այժմ, մի քանի
վիրահատություններից հետո, շինարարի առողջական վիճակը գնահատվում է
կայուն: