ԵՐԳԻՉ ՀԱՄԼԵՏ ԳԵՎՈՐԳՅԱՆԸ ԱՐԺԱՆԱՑԵԼ Է ԱՌԱՋԻՆ ՄՐՑԱՆԱԿԻ
«SONICBIDS» ԸՆԿԵՐՈՒԹՅԱՆ ԻՆՏԵՐՆԵՏԱՅԻՆ ՄՐՑՈՒՅԹՈՒՄ
16-11-2007 14:40:00 | Հայաստան | Մշակույթ
ԵՐԵՎԱՆ, 16 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Ամերիկյան «Sonicbids»
ընկերության անցկացրած ինտերնետային մրցույթում առաջին մրցանակի է
արժանացել հայկական ժողովրդական երգերի կատարող Համլետ Գեւորգյանը:
Երգիչը մրցույթին մասնակցել է Միջազգային երաժշտական ինֆորմացիոն
կենտրոնի անդամ «Armenian music center»-ի (AMC) նախաձեռնությամբ:
Ինչպես նոյեմբերի 16-ի ասուլիսում հայտնեց AMC-ի մենեջեր
Լիլիթ Արշակյանը, մրցույթին մասնակցել են տարբեր երկրների բազմաթիվ
երգիչներ, եւ ընդհանուր առմամբ ներկայացվել են 1 միլիոնից ավելի
ստեղծագործություն: Հ.Գեւորգյանը ներկայացրել է հայկական
ժողովրդական երգեր, ինչպես նաեւ հատուկ իր համար գրված
ստեղծագործություններ:
«Մենք փորձեցինք միջազգային ճանաչում ունեցող նախագծում
ներկայացնել հայկական ժողովրդական երգերը, որպեսզի մեզ առաջին
հերթին ճանաչեն մեր ազգայինով երգարվեստով»,- նշեց Լ.Արշակյանը:
Նրա խոսքերով, այս մրցույթից հետո Հ.Գեւորգյանը հնարավորություն
կունենա համագործակցել աշխարհահռչակ պրոդյուսերական կենտրոնների
հետ եւ դուրս գալ միջազգային ասպարեզ: Նշվեց նաեւ, որ մրցույթից
հետո երգիչն արդեն տարբեր միջազգային փառատոնների եւ համերգների
մասնակցության հրավեր է ստացել:
Լ.Արշակյանը տեղեկացրեց նաեւ, որ մրցանակաբաշխությունը
կկայանա 2008թ.-ի հունվարին` Փարիզում: