ԲԱՂԴԱԴ, 26 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Բաղդադում ԱՄՆ-ի դեսպան Ռայան Կրոկերը հոկտեմբերի 26-ին Իրաքի կառավարությունից պահանջել է «արգելափակել լեռնային շրջանները եւ ձերբակալել այնտեղ թաքնվող բոլոր քուրդ ապստամբներին»: Ըստ դիվանագետի, իրաքյան իշխանությունները պետք է Անկարայի պահանջներին պատասխանեն Քրդական բանվորական կուսակցության (PKK) զինյալների դեմ «գործուն միջոցներով»: Կրոկերը կոչ է արել նաեւ Իրաքի հյուսիսային քրդական ինքնավար շրջանի վարչակազմին «ներկայացնել PKK անդամների ցուցակը, որոնք թաքնվում են իրաքյան տարածքում»: Ամերիկացի դիվանագետի հայտարարությունը հնչել է այն բանից հետո, երբ Թուրքիայի վարչապետ Թայիփ Էրդողանը կասկած էր հայտնել «սահմանամերձ տարածաշրջանում իրադրությունը արագ եւ արմատապես փոխելու Միացյալ Նահանգների ընդունակության» առնչությամբ:

---