ՎԱՇԻՆԳՏՈՆ, 15 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Պենտագոնը առաջարկում է արբանյակների ուղեծրային խմբավորում ստեղծել, որոնք կհավաքեին արեւային էներգիան եւ այն կհաղորդեին Երկիր, ասվում է ամերիկյան ռազմական գերատեսչության 75-էջանոց նոր զեկույցում: Չնայած նախագիծը նվազագույնը 10 միլիարդ է գնահատվում, ամերիկացի զինվորականները ենթադրում են, որ տիեզերքից ստացված էլեկտրաէներգիան կարող է նվազեցնել ռազմական գերատեսչության ծախսերը: Այս հայեցակետը նոր չէ, համանման գաղափարներ ծագել են դեռ 70-ական թվականներին, սակայն այն ժամանակ ոչ տեխնոլոգիաներ կային, որոնց օգնությամբ դա հնարավոր լիներ կյանքի կոչել, ոչ ֆինանսական միջոցներ: Զեկույցում նշվում է, որ մի քանի տարվա ընթացքում կզարգացվեն տեխնոլոգիաներ, որոնք դեռ չկան, իսկ առաջին էլեկտրաէներգիան տիեզերքից կարող է հաղորդվել արդեն 2012-2013 թվականին երկրամերձ ուղեծրում գտնվող արբանյակների միջոցով: Արբանյակները ծրագրվում է ուղեծիր տեղափոխել մինչեւ 2017 թվականը: Նոր զեկույցին ակնթարթորեն արձագանքել են ամերիկյան գիտահետազոտական կազմակերպությունները, որոնցից 13-ը ձեւավորել են «Ապագայի տիեզերական արեւային էներգիայի դաշինք»:

---