ՑՅՈՒՐԻԽՈՒՄ ԲԱՑՎԵԼ Է ՀԱՅԿԱԿԱՆ ԺԱՄԱՆԱԿԱԿԻՑ ԱՐՎԵՍՏԻՆ ԵՎ
ՃԱՐՏԱՐԱՊԵՏՈՒԹՅԱՆԸ ՆՎԻՐՎԱԾ ՑՈՒՑԱՀԱՆԴԵՍ
05-10-2007 19:40:00 | Շվեյցարիա | Մշակույթ
ՑՅՈՒՐԻԽ, 5 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Ցյուրիխի «EWZ»
ցուցասրահում հոկտեմբերի 4-ին բացվել է «Հայկական բնանկարները
ժամանակակից արվեստում եւ ճարտարապետությունում» ցուցահանդեսը: Այն
կազմակերպվել է Շվեյցարիայում Հայաստանի դեսպանության ջանքերով`
Ցյուրիխի քաղաքապետարանի սերտ համագործակցությամբ:
«Խորհրդանիշների բնանկար, կառուցված միջավայրի բնանկար,
երազանքների բնանկար» խորագրով անցնող ցուցահանդեսը նվիրված է
Հայաստանի ժամանակակից արվեստին եւ ճարտարապետությանը: Այն
հանդիսատեսին է ներկայացնում, թե ինչպես տեղանքը, բնակավայրն ու
միջավայրը համադրության մեջ իրենց ազդեցությունն ու դրոշմն են
թողում ճարտարապետության, գրականության, գեղարվեստի եւ
երաժշտության վրա:
Ինչպես «ՆՈՅՅԱՆ ՏԱՊԱՆ»-ին հայտնեցին ՀՀ ԱԳՆ Մամուլի եւ
տեղեկատվության վարչությունից, ցուցահանդեսը հերթականն է
Շվեյցարիայում ՀՀ դեսպանության կազմակերպած միջոցառումների
շարքում, որոնց նպատակն է ներկայացնել Հայաստանի հարուստ
մշակութային ժառանգությունը որպես արեւելքի ու արեւմուտքի
խաչմերուկում ձեւավորված յուրօրինակ գոյություն: Դրանցից
ամենանշանակալիցը Ժնեւում սեպտեմբերին բացված «Հայաստանի
մանրանկարչությունը. Մատենադարանի հավաքածուն» ցուցահանդեսն է: