ԻԳՈՐ ԼԵՎԻՏԻՆ. «ԱՅՍ ՏԱՐԻ ՀԱՅԱՍՏԱՆՈՒՄ ՌՈՒՍԱԿԱՆ ՆԵՐԴՐՈՒՄՆԵՐԻ
ԾԱՎԱԼԸ ԿՀԱՍՆԻ ԿԵՍ ՄԻԼԻԱՐԴ ԴՈԼԱՐԻ»
14-09-2007 20:00:00 | Հայաստան | Տնտեսություն
ԵՐԵՎԱՆ, 14 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Սեպտեմբերի 14-ին
Երեւանում կայացավ Տնտեսական համագործակցության հարցերով
հայ-ռուսական միջկառավարական հանձնաժողովի 9-րդ նիստը: Նիստից
հաջորդած ասուլիսում հանձնաժողովի համանախագահ, ՌԴ տրանսպորտի
նախարար Իգոր Լեւիտինը նշեց, որ երկու երկրների միջեւ
ապրանքաշրջանառության ծավալները տարեցտարի աճում են, զգալի աճ է
գրանցվել նաեւ ներդրումների առումով. այս տարի ռուսական
ներդրումների ծավալը կհասնի կես մլրդ դոլարի:
Ըստ Ի.Լեւիտինի, երկու երկրների տնտհամագործակցությունում
գլխավոր խնդիրը տրանսպորտային հաղոդակցությունն է: Թեեւ այդ
ուղղությամբ որոշակի քայլեր արդեն արվել են` գործարկվել է
լաստանավային փոխդրակապը, այդուհանդերձ այն դեռեւս կանոնավոր չի
գործում: Դրան հասնելու համար, ինչպես նշեց Ի.Լեւիտինը, պետք է
երկուստեք ավելացնել բեռնափոխադրումների ծավալները:
Հանձնաժողովի հայկական կողմի համանախագահ, ՀՀ վարչապետ Սերժ
Սարգսյանը նշեց, որ հանձնաժողովի 9-րդ նիստի արդյունքներով
կստորագրվի համաձայնագիր, որով ռուսական խոշոր ընկերություններից
մեկը գործունեություն կծավալի Հայաստանում: ՀՀ վարչապետը հայտնեց
նաեւ, որ հանձնաժողովի 10-րդ նիստում, որը տեղի կունենա ՌԴ-ում,
ավելի խոշորածավալ գործարքներ կկնքվեն:
Ս.Սարգսյանի խոսքերով, չնայած Ռուսաստանի կառավարությունում
տեղի ունեցած փոփոխության, իր պաշտոնական այցը Մոսկվա մնում է ուժի
մեջ: Կարեւորելով այցը, վարչապետը նշեց, որ այն հնարավորություն
կտա ՌԴ-ի նոր վարչապետի եւ կառավարության անդամների հետ հաստատել
անձնական կապեր: