ԵՐԵՎԱՆԻ ՔԱՂԱՔԱՊԵՏԱՐԱՆԸ ՇԱՐՈՒՆԱԿՈՒՄ Է ՊԱՅՔԱՐԸ ՓՈՂՈՑԱՅԻՆ
ԱՌԵՎՏՐԻ ԴԵՄ
19-06-2007 17:35:00 | Հայաստան | Հասարակություն
ԵՐԵՎԱՆ, 19 ՀՈՒՆԻՍԻ, ՆՈՅՅԱՆ ՏԱՊԱՆ: ՀՀ Ոստիկանության եւ
Գյուղատնտեսության նախարարության հետ համատեղ Երեւանի
քաղաքապետարանը հունիսի 1-ից իրականացնում է բացօթյա
վաճառակետերում պատրաստվող սննդամթերքի վաճառքի դեմ ուղղված
միջոցառումներ: Ինչպես «ՆՈՅՅԱՆ ՏԱՊԱՆ»-ի թղթակցի հետ զրույցում
հայտնեց քաղաքապետարանի Առեւտրի եւ սպասարկման վարչության պետ
Կարեն Գեւորգյանը, մայրաքաղաքում անցկացվող ամենօրյա ստուգումների
արդյունքում արդեն առգրավվել են լցնովի պաղպաղակի 12, զովացուցիչ
ըմպելիքների եւ ղարսի խորովածի պատրաստման 2-ական սարքավորումներ:
Կ.Գեւորգյանի խոսքերով, թեեւ սննդամթերքի փողոցային առեւտրի
դեմ լուրջ պայքար է իրականացվում, այն անհնար է վերացնել միայն
քաղաքապետարանի ուժերով: «Մայրաքաղաքում այդպիսի սարքավորումները
բազմաթիվ են, բայց շրջայցերի ժամանակ դրանք թաքցվում են: Դրա համար
անհրաժեշտ է թաղապետարանների աջակցությունը, որպեսզի ամենօրյա
ստուգումների արդյունքում կարողանանք պայքարել ոչ միայն փողոցային
առեւտրի, այլեւ արագ պատրաստվող սննդամթերքի վաճառքի դեմ»,- նշեց
Կ.Գեւորգյանը: Նրա խոսքերով, քաղաքացիները պետք է գիտակցեն, որ
փողոցում վաճառվող մթերքը վտանգավոր է առողջության համար, քանի որ
այն իրացվում է սանիտարահիգիենիկ նորմերին չհամապատասխանող
պայմաններում:
Վարչության պետը նշեց, որ միջոցառումներ են նախատեսվում
իրականացնել նաեւ փողոցներում ձմերուկի եւ սեխի վաճառքի դեմ:
Թաղապետարաններն արդեն զգուշացվել են, որպեսզի համայնքներում,
մասնավորապես բնակելի շենքերի հարեւանությամբ, ձմերուկի եւ սեխի
վաճառքի համար տեղեր հատկացվեն: