ԳԱՐԵԳԻՆ Բ ԱՄԵՆԱՅՆ ՀԱՅՈՑ ԿԱԹՈՂԻԿՈՍԸ ՀԱՋՈՂՈՒԹՅՈՒՆ ԵՎ ԲԱՐԻ
ԸՆԹԱՑՔ ՄԱՂԹԵՑ ԱԶԳԱՅԻՆ ԺՈՂՈՎԻ ԱՇԽԱՏԱՆՔՆԵՐԻՆ
07-06-2007 19:25:00 | Հայաստան | Հասարակություն
ԵՐԵՎԱՆ, 7 ՀՈՒՆԻՍԻ, ՆՈՅՅԱՆ ՏԱՊԱՆ: Հունիսի 7-ին ՀՀ Ազգային
Ժողովի 4-րդ գումարման անդրանիկ նիստում հանդես եկավ Գարեգին Բ
Ամենայն հայոց կաթողիկոսը, որը ողջույնի եւ շնորհավորանքի խոսքով
դիմեց նորակազմ խորհրդարանի պատգամավորներին: Այս մասին «ՆՈՅՅԱՆ
ՏԱՊԱՆ»-ին տեղեկացրեցին Մայր Աթոռ Ս.Էջմիածնի Տեղեկատվական
համակարգից: Իր խոսքում Վեհափառ Հայրապետը մասնավորապես ասաց.
«Ինքնիշխան պետականության վերահաստատումից ի վեր Ազգային
Ժողովը կարեւոր նպաստ է բերել պետականաշինության գործին, օրենքներ է
մշակել հանուն մեր երկրում որոշիչ վերափոխումների իրականացման,
հոգեւոր, տնտեսական եւ ընկերային կյանքի բարեփոխման, կրթության,
գիտության ու մշակույթի առաջընթացի: Դուք, մեծարգո պատգամավորներ,
կոչված եք օրենսդիր բարձր իշխանությամբ ծառայելու մեր Հայրենիքին
ու ժողովրդին այնպիսի ժամանակում, երբ մեր ժողովուրդը ավելի մոտ է
տեսնում հզոր ու բարօր Հայրենիքի, ապահով ու երջանիկ կյանքի իր
տեսիլքը: Ավելի պակաս ջանքեր ու ավելի պակաս նվիրում չպիտի
պահանջվեն այդ ճանապարհին: Հարկ ի վերա ձեր կա` արդյունավորությամբ
շարունակելու Ազգային Ժողովի առաքելությունը:
Արդ, խնդրենք, որ Տերը մեր Քրիստոս հավելի մեզանում հավատը
ճշմարտադավան, հույսը` կենարար եւ սերը` հրաշագործող` բարիք
ստեղծելու ու բարին գործելու, մեր պատմության հուսաբեր նոր օրը
կերտելու:
Մաղթում ենք ձեզ, սիրելի պատգամավորներ, կորովաշատ
ծառայություն եւ բազմարդյուն գործունեություն, որպեսզի դուք եւ մեր
ողջ ժողովուրդը ուրախանանք ձեր ջանքերի առատ պտուղներով:
Թող հանապազօրյա Մեր աղոթքով եւ մեր սուրբ նախնյաց
բարեխոսությամբ Տիրոջ ճշմարտության հոգին միշտ առաջնորդ լինի ձեզ:
Հաջողություն ձեզ եւ բարի ընթացք Ազգային Ժողովի աշխատանքներին»: