ՀԱՍՏԱՏՎԵԼ ԵՆ ՀՀ-ՈՒՄ ԹՌԻՉՔԱՅԻՆ ԱՆՎՏԱՆԳՈՒԹՅԱՆ ԿԱՆՈՆՆԵՐԸ
06-06-2007 17:36:00 | Հայաստան | Հասարակություն
ԵՐԵՎԱՆ, 6 ՀՈՒՆԻՍԻ, ՆՈՅՅԱՆ ՏԱՊԱՆ: ՀՀ կառավարության հունիսի
6-ի նիստում հաստատվել են Հայաստանում թռիչքային անվտանգության
կանոնները: Ինչպես լրագրողներին հայտնեց ՀՀ Քաղավիացիայի
վարչության պետ Արտյոմ Մովսեսյանը, նոր կանոնների հաստատումը
պայմանավորված է Միջազգային ավիացիոն կազմակերպության` ԻԿԱՕ-ի
պահանջներով եւ «Ավիացիայի մասին» ՀՀ օրենքում կատարված
փոփոխություններով:
Ա. Մովսեսյանը նշեց, որ նոր կանոններով ամրագրվում է, թե
ինչպես պետք է օդանավ շահագործողը բախումներից խուսափելու համար
այն շահագործի: Դրանով կարգավորվում են նաեւ տեսանելի թռիչքները,
անօրինական միջամտության դեպքերը: Ըստ նրա, ամրագրված է նաեւ, թե
ինչպիսի միջամտություն պետք է իրականացնի օդաչուն օդանավում
անօրինական միջամտության դեպքում. դա վերաբերում է օդանավի լույս
արձակելուն, սպասարկող կազմակերպության հետ խոսակցությանը եւ այլն:
Նման բախումներից խուսափելու համար մեծացվել է նաեւ օդանավի
հրամանատարի պատասխանատվությունը: