ՊԵՏԱԿԱՆ ԱԿԱԴԵՄԻԱԿԱՆ ԵՐԳՉԱԽՈՒՄԲԸ ՀԱՄԵՐԳՆԵՐ ԿՏԱ ՍՈՒՐԲ ԳՐԻԳՈՐ
ԼՈՒՍԱՎՈՐԻՉ ԵԿԵՂԵՑՈՒՄ ԵՎ ԱՐՑԱԽՈՒՄ
30-05-2007 18:40:00 | Հայաստան | Մշակույթ
ԵՐԵՎԱՆ, 30 ՄԱՅԻՍԻ, ՆՈՅՅԱՆ ՏԱՊԱՆ: Հունիսի 2-ին Սբ. Գրիգոր
Լուսավորիչ եկեղեցում կկայանա Հայաստանի պետական ակադեմիական
երգչախմբի համերգը` նվիրված երգչախմբի հիմնադրման 70-ամյակին:
Ինչպես մայիսի 30-ի ասուլիսում հայտնեց ՀՀ Մշակույթի եւ
երիտասարդության հարցերի փոխնախարար Կարինե Խոդիկյանը, ՀՀ
Ժողովրդական արտիստ, դիրիժոր Հովհաննես Չեքիջյանի գլխավորությամբ
երգչախումբը կներկայացնի հոգեւոր խմբերգային երաժշտության
նմուշներ:
Կ.Խոդիկյանը նշեց, որ նախարարության նախաձեռնությամբ
երգչախումբը համերգներ կունենա նաեւ Արցախում: Բացի այդ, Հայոց
բանակի ստեղծման եւ Շուշիի ազատագրման 15-ամյակների կապակցությամբ
Շուշիի Ղազանչեցոց եկեղեցու բակում կկայանա Հայաստանի պետական
կամերային նվագախմբի համերգը: Արցախում համերգներ կանցկացվեն նաեւ
«Մեկ ազգ, մեկ մշակույթ» հիմնադրամի կողմից:
Փոխնախարարի խոսքերով, Հայոց բանակի ստեղծման եւ Շուշիի
ազատագրման 15-ամյակների կապակցությամբ նախարարությունը
իրականացրել է բազմաբնույթ միջոցառումներ, այդ թվում «Հաղթական
քոչարին Շուշիում» պարային համույթների փառատոն, գեղանկարի եւ
գեղարվեստական լուսանկարի մրցույթ-ցուցահանդես, ինչպես նաեւ
Հայաստանի պետական ֆիլհարմոնիկ նվագախմբի համերգը: Կ.Խոդիկյանը
հայտնեց նաեւ, որ միջոցառումների շրջանակում նախարարությունը
Ստեփանակերտի կենտրոնական գրադարանին է տրամադրել 3478 գրքեր: