ՀԱՅԱՍՏԱՆԻ ԼՈՂԻ ԱՌԱՋՆՈՒԹՅՈՒՆՈՒՄ ԳՐԱՆՑՎԵԼ Է ՀԱՆՐԱՊԵՏԱԿԱՆ 5
ՆՈՐ ՌԵԿՈՐԴ
14-05-2007 18:24:00 | Հայաստան | Սպորտ
ԵՐԵՎԱՆ, 14 ՄԱՅԻՍԻ, ՆՈՅՅԱՆ ՏԱՊԱՆ: Մայիսի 9-11-ին Երեւանի
Դավիթ Համբարձումյանի անվան ջրային մարզաձեւերի մասնագիտացված
մարզադպրոցում անցկացված Հայաստանի լողի առաջնությանը մասնակցում
էին 8 թիմերի 110 լողորդներ: Առաջնությունում գրանցվեց
հանրապետական 5 նոր ռեկորդ, իսկ 8 մրցաձեւում` սպորտի վարպետի
համար սահմանված ցուցանիշից բարձր արդյունք:
16-ամյա Խաչիկ Փլավչյանը (Էջմիածին), որը հաղթող ճանաչվեց
թիկնալողում 50 մ, 100 մ եւ 200 մ մրցատարածությունում, բացի այդ
100 մ մրցատարածությունում սահմանեց հանրապետական ռեկորդ` 1 րոպե
00,90 վրկ: Իսկ «դելֆին» լողաոճում 50 մ, 100 մ, եւ 200 մ
մրցատարածությունում առաջին տեղը գրաված Ֆիզկուլտուրայի ինստիտուտի
ուսանող Գուրգեն Չավուշյանը հանրապետական ռեկորդ սահմանեց 100 մ
մրցատարածությունում` 59,47 վրկ:
Հայաստանի ազգային հավաքականը հանրապետական 3 նոր ռեկորդ
սահմանեց 4x50 մ` ազատ, 4x100 մ` ազատ, եւ 4x100 մ` համալիր
փոխանցալողերում:
Լողի հանրապետական ֆեդերացիայի նախագահ Իգոր Սաֆարյանը
«ՆՈՅՅԱՆ ՏԱՊԱՆ»-ի թղթակցի հետ զրույցի ժամանակ առանձնացրեց
թիկնալողում 50 մ, 100 մ եւ 200 մ մրցատարածությունում հաղթող
ճանաչված 12-ամյա Անահիտ Բարսեղյանին, ինչպես նաեւ Միքայել
Քոլոյանին, որը լավագույնն էր ազատ լողաոճում 100 մ, 200 մ, 400 մ
եւ համալիր լողում 200 մ մրցատարածություններում: Երկուսն էլ
ներկայացնում են Երեւանի «Նեպտուն» մարզական ակումբը:
«Բրաս» լողաոճում 100 մ եւ 200 մ մրցատարածությունում
Հայաստանի չեմպիոն դարձավ Ալեքսանդր Ալիսյանը:
«Բրաս» լողաոճում 50 մ մրցատարածությունում չեմպիոնի կոչումը
Արամ Նազարյանը: Հիշեցնենք, որ վերջինս Ավստրալիայում անցկացված
2007թ.-ի աշխարհի առաջնությունից հետո Հայաստանի հավաքականի հետ
չվերադարձավ Երեւան, եւ ԶԼՄ-ները շտապեցին հայտնել, որ նա փախել է
եւ ստացել Ավստրալիայի քաղաքացիություն: Բայց լողորդը 2 շաբաթ անց
վերադարձավ Երեւան, շարունակեց մարզվել եւ մասնակցեց Հայաստանի
առաջնությանը:
Նշենք, որ 1988թ.-ի երկրաշարժից հետո առաջին անգամ Հայաստանի
առաջնությանը 11 լողորդ էր ներկայացրել Գյումրին: Նրանցից Արուսյակ
Այվազյանը ազատ լողաոճով 200 մ եւ 400 մ մրցատարածություններում
դարձավ, համապատասխանաբար, 2-րդ եւ 3-րդ մրցանակակիր: