ՀԱՇՄԱՆԴԱՄՆԵՐԻ ՄԱՍՆԱԿՑՈՒԹՅԱՄԲ ՄԱՐՏԻ 31-ԻՆ ՎԱՆԱՁՈՐՈՒՄ
ԿԱՆՑԿԱՑՎԻ ՄԱՐԶԱՅԻՆ ՄՇԱԿՈՒԹԱՅԻՆ ՓԱՌԱՏՈՆ
30-03-2007 15:50:00 | Հայաստան | Հասարակություն
ԵՐԵՎԱՆ, 30 ՄԱՐՏԻ, ՆՈՅՅԱՆ ՏԱՊԱՆ: «Լուսաստղ» բարեգործական
հասարակական կազմակերպության կողմից Լոռու մարզում իրականացվող
«Արվեստը սահմաններ չունի» ծրագրի շրջանակներում մարտի 31-ին
Վանաձորում կանցկացվի մարզային մշակութային փառատոն, որին
կմասնակցեն նաեւ հաշմանդամները: Ինչպես «ՆՈՅՅԱՆ ՏԱՊԱՆ»-ի թղթակցին
հայտնեց կազմակերպության նախագահ Նունե Պեպանյանը, ծրագրի
շրջանակներում նախատեսվում է կազմակերպել նաեւ հաշմանդամների ձեռքի
աշխատանքների ցուցահանդես:
Ն.Պեպանյանը նշեց, որ ծրագրի նպատակն է մշակութային
միջոցառումների իրականացման միջոցով նպաստել հասարակությունում
հաշմանդամների ինտեգրմանը: Ծրագիրն իրականացվում է ՀՀ նախագահի
աշխատակազմի կողմից տրամադրած 3 մլն 900 հազար դրամով (մոտ 10,8
հազ. ԱՄՆ դոլար):
Ի դեպ, Լոռու մարզում ապրում են 12,5 հազ. հաշմանդամներ: