«ԵՐԿՐԱՇԱՐԺԵՐԻ ԺԱՄԱՆԱԿ ԱՄԵՆԻՑ ՇԱՏ ՏՈՒԺՈՒՄ ԵՆ ԴՊՐՈՑԱՀԱՍԱԿ
ԵՐԵԽԱՆԵՐԸ»,- ԱՍՈՒՄ Է ՀԱՅԱՍՏԱՆՈՒՄ ՅՈՒՆԻՍԵՖԻ ՆԵՐԿԱՅԱՑՈՒՑԻՉԸ
20-03-2007 16:40:00 | Հայաստան | Հասարակություն
ԵՐԵՎԱՆ, 20 ՄԱՐՏԻ, ՆՈՅՅԱՆ ՏԱՊԱՆ: ՅՈՒՆԻՍԵՖ-ը ՄԱԿ-ի Աղետների
Հետեւանքների նվազեցման միջազգային քարտուղարության եւ Կենտրոնական
Ասիայի Եկրաշարժերի դեմ պաշտպանվածության նախաձեռնության հետ
համատեղ օրերս կազմակերպել էր «Երկրաշարժերից պաշտպանված դպրոցներ»
թեմայով երկօրյա քննարկում: Ինչպես նշված է «ՆՈՅՅԱՆ ՏԱՊԱՆ»-ին
ՄԱԿ-ի Մանկական հիմնադրամի հայաստանյան գրասենյակից տրամադրած
հաղորդագրությունում, քննարկման նպատակն էր ներկայացնել, թե ինչպես
կարող են դպրոցներն ու համայնքները ավելի լավ պատրաստված լինել
երկրաշարժերի ժամանակ: Քննարկմանը մասնակցել են ՀՀ Կրթության եւ
գիտության նախարարության, Կրթության ազգային ինստիտուտի,
Ճգնաժամային իրավիճակների կառավարման ակադեմիայի, Հայկական Կարմիր
Խաչի ընկերության ներկայացուցիչներ, ինչպես նաեւ մի շարք դպրոցների
տնօրեններ եւ ուսուցիչներ:
«Աղետները, այդ թվում երկրաշարժերը, կարող են տեղի ունենալ
ցանկացած պահին եւ ցանկացած վայրում: Քաջ գիտակցելով դրանց
հետեւանքները երեխաների համար, մենք պարտավոր ենք նախապես
պատրաստվել դրանց դիմակայելու»,- նշել է Հայաստանում ՅՈՒՆԻՍԵՖ-ի
ներկայացուցիչ Շելդոն Յեթը: Ըստ նրա, միջազգային փորձը եւ
Հայաստանում 1988թ.-ին տեղի ունեցած աղետալի երկրաշարժը ցույց են
տվել, որ հաճախ երկրաշարժերի ժամանակ ամենից շատ տուժում են հենց
դպրոցահասակ երեխաները: