«ԱՐՄԵՆԻԱ» ԲԺՇԿԱԿԱՆ ԿԵՆՏՐՈՆԻ ՎԻՐԱԲՈՒՅԺԸ ԴԱՏԱՊԱՐՏՎԵՑ 4 ՏԱՐՎԱ
ԱԶԱՏԱԶՐԿՄԱՆ
14-03-2007 15:34:00 | Հայաստան | Հասարակություն
ԵՐԵՎԱՆ, 14 ՄԱՐՏԻ, ՆՈՅՅԱՆ ՏԱՊԱՆ: Երեւանի Աջափնյակ եւ
Դավիթաշեն համայնքների առաջին ատյանի դատարանը մարտի 14-ին 4 տարվա
ազատազրկման դատապարտեց «Արմենիա» բժշկական կենտրոնի 2-րդ
վիրաբուժական բաժանմունքի վիրաբույժ Արմեն Սարգսյանին: Այդպիսով
դատարանը հիմնավորված համարեց նրա նկատմամբ առաջադրված իր
պարտականությունները ոչ պատշաճ կատարելու, դրանք անփույթ եւ
անբարեխիղճ կատարելու հետեւանքով բուժվող հիվանդ Նունե
Բաղդասարյանի (ծնված 1984թ) մահն առաջացնելու մեղադրանքները:
Ավելին, Ա.Սարգսյանը, ըստ մեղադրանքի, վերը նշվածը թաքցնելու
նպատակով կատարել էր նաեւ փաստաթղթային կեղծիք:
Ն.Բաղդասարյանը 2005թ-ի հոկտեմբերի 19-ին հիվանդանոց է
ընդունվել «սուր որովայն, սուր դեստրուկտիվ ապենդիցիտ, տեղային
պերիտոնիա» ախտորոշմամբ: Նույն օրը Ա.Սարգսյանը վիրահատել է նրան,
հիվանդը տեղափոխվել է թերապիայի բաժանմունք եւ չնայած դրենաժից
առկա շճայի արտադրանքի, դրենաժը հեռացվել է: Բացի այդ, հիվանդը
դուրս է գրվել հիվանդանոցից 37,2 աստիճան ջերմությամբ: Մինչեւ
հիվանդի հաջորդ անգամ հիվանդանոց ներկայանալը` հոկտեմբերի 26-ը,
որեւէ հսկողություն կամ հետազոտություն չի իրականացվել, թեեւ
որովայնի խոռոչում պաթոլոգիան շարունակվել է, զարգացել է
հետվիրահատական պերիտոնիտ: Արդյունքում շճային պերիտոնիտը զարգացել
է եւ վերածվել տարածուն ֆիբրինոզ թարախային պերիտոնիտի: Հոկտեմբերի
26-ին բժիշկը ճիշտ ախտորոշում չի կատարել եւ 38,5 ջերմությամբ
որովայնի շրջանում ցավերի ու փքվածության առկայության պայմաններում
հիվանդին նորից ուղարկել տուն: Հոկտեմբերի 27-ին արդեն այլ
մասնագետի կողմից հետազոտվելուց հետո Ն.Բաղդասարյանը
կրկնավիրահատվել է, սակայն կյանքի հետ անհամատեղելի
բարդությունների զարգացման հետեւանքով նրա կյանքը փրկել չի
հաջողվել, եւ հոկտեմբերի 28-ին Ն.Բաղդասարյանը մահացել է: