ՍԵՆՏ-ԷՏԻԵՆՈՒՄ ԱՆՑԿԱՑՎԵԼ Է ՀԱՅԱՍՏԱՆԻ ՖԻԼՀԱՐՄՈՆԻԿ ՆՎԱԳԱԽՄԲԻ
ՀԱՄԵՐԳԸ
12-02-2007 21:37:00 | Ֆրանսիա | Մշակույթ
ՍԵՆՏ-ԷՏԻԵՆ, 12 ՓԵՏՐՎԱՐԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ:
Ֆրանսիայի Սենտ-Էտիեն քաղաքի Մասնե օպերային թատրոնում փետրվարի
10-ին հանդես է եկել Հայաստանի Ֆիլհարմոնիկ նվագախումբը Էդուարդ
Թոփչյանի գլխավորությամբ:
Ֆրանսիայում Հայաստանի տարվա շրջանակներում կազմակերպված
համերգին, ուր ներկա են գտնվել դեսպան Էդվարդ Նալբանդյանը,
Ֆրանսիայի Լուարի շրջանի ղեկավարությունը, Սենտ-Էտիենի քաղաքապետ,
սենատոր Միշել Թիոլիերը, սենատորներ, պատգամավորներ, շրջանի այլ
քաղաքների քաղաքապետեր, հանդիսականները հոտնկայս
ծափահարություններով եւ օվացիաներով են դիմավորել նվագախմբի
կատարումները:
Ինչպես «ՆՈՅՅԱՆ ՏԱՊԱՆ»-ին հայտնեցին ՀՀ ԱԳՆ Մամուլի եւ
տեղեկատվության վարչությունից, ծրագրի առանցքն էին կազմում Արամ
Խաչատրյանի եւ Յան Սիբելիուսի ստեղծագործությունները: Մենակատարն
էր համաշխարհային հռչակի երիտասարդ ջութակահար Սերգեյ Խաչատրյանը,
որը նվագախմբի հետ հանդես է գալու նաեւ փետրվարի 14-ին
Իսի-լե-Մուլինոյում:
Մինչ այդ, փետրվարի 6-ին եւ 8-ին Հայաստանի Ֆիլհարմոնիկ
նվագախումբը հանդես էր եկել Նիցցայում եւ Վանդեում` Լը
Պուարե-սյուր-Վիում: Եւս չորս համերգներ նախատեսված են առաջիկա
շաբաթվա ընթացքում` փետրվարի 11-ին Լիոնում, 12-ին Վիեննում, 13-ին
Մարսելում եւ 14-ին Իսի-լե-Մուլինոյում: Վանդեում ֆիլհարմոնիկին
նվագակցում էր դաշնակահար Վարդան Մամիկոնյանը, իսկ Լիոնում եւ
Մարսելում` դաշնակահար Վահան Մարտիրոսյանը, որոնք երկուսն էլ
հայտնի անուններ են Ֆրանսիայում: