ՓԵՏՐՎԱՐԻ 13-ԻՆ ԿՄԵԿՆԱՐԿԻ ՀԱՅԱՍՏԱՆԻ ԲՌՆՑՔԱՄԱՐՏԻ ՊԱՏԱՆԵԿԱՆ
ԱՌԱՋՆՈՒԹՅՈՒՆԸ
12-02-2007 17:43:00 | Հայաստան | Սպորտ
ԵՐԵՎԱՆ, 12 ՓԵՏՐՎԱՐԻ, ՆՈՅՅԱՆ ՏԱՊԱՆ: Փետրվարի 13-ին Երեւանի
«Դինամո» մարզադահլիճում կմեկնարկի Հայաստանի բռնցքամարտի
պատանեկան առաջնությունը: Առաջնությանը հայտավորված են 13 քաշային
կարգերի 157 մարզիկներ: Հաղթողները հայտնի կդառնան փետրվարի 17-ին:
Ինչպես «ՆՈՅՅԱՆ ՏԱՊԱՆ»-ի թղթակցին հայտնեց Հայաստանի
հավաքականի ավագ մարզիչ, վաստակավոր մարզիչ Ֆեբիա Ալեքսանյանը,
առաջնությունը ընտրական բնույթ է կրում: Առաջնության արդյունքներով
կազմված հավաքականը ուսումնամարզական հավաքներ կանցկացնի
Երեւանում, Ծաղկաձորում եւ Մոսկվայում: Իսկ հունիսին հավաքականը
կմեկնի Հունգարիա` մասնակցելու Եվրոպայի պատանեկան առաջնությանը: