ՀԱՅԱՍՏԱՆԸ ԿՄԱՍՆԱԿՑԻ ՍԵՎԾՈՎՅԱՆ ԵՐԿՐՆԵՐԻ 1-ԻՆ ՄԱՐԶԱԿԱՆ
ԽԱՂԵՐԻՆ
07-02-2007 13:23:00 | Հայաստան | Սպորտ
ԵՐԵՎԱՆ, 7 ՓԵՏՐՎԱՐԻ, ՆՈՅՅԱՆ ՏԱՊԱՆ: Հուլիսի 2-8-ին Թուրքիայի
Տրապիզոն քաղաքում անցկացվելիք Սեւծովյան երկրների 1-ին մարզական
երիտասարդական խաղերին կմասնակցեն նաեւ Հայաստանի
ներկայացուցիչները: Ինչպես «ՆՈՅՅԱՆ ՏԱՊԱՆ»-ի թղթակցին հայտնեց ՀՀ
Սպորտպետկոմի մամլո քարտուղար Յուրի Ալեքսանյանը, ազատ եւ
հունահռոմեական ոճի ըմբշամարտի մրցումներում հանդես կգան 6-ական
հայաստանցի մարզիկներ, թայեքվանդոյի` 3 տղա եւ 1 աղջիկ,
աթլետիկայի` 4 աղջիկ եւ 1 տղա, ֆուտբոլի մրցաշարում` 16-17
տարեկանների թիմը:
Նշած մարզաձեւերից բացի խաղերի ծրագրում ընդգրկված են նաեւ
նետաձգություն, գեղարվեստական մարմնամարզություն, վոլեյբոլ
(աղջիկներ), բասկետբոլ (տղաներ) եւ լող: Խաղերին, բացի Հայաստանից,
կմասնակցեն նաեւ Ալբանիայի, Բուլղարիայի, Ադրբեջանի, Վրաստանի,
Հունաստանի, Մոլդովայի, Ռումինիայի, Ռուսաստանի, Սերբիայի,
Ուկրաինայի եւ Թուրքիայի մարզիկ-մարզուհիները:
Սեւծովյան երկրների 2-րդ մարզական երիտասարդական խաղերը
կանցկացվեն 3 տարի հետո` 2010թ.-ին: Սկսած 3-րդ խաղերից
միջոցառումը տեղի կունենա օլիմպիական ցիկլով` 4 տարին մեկ անգամ: