Եգիպտոսի հայկական եկեղեցին աշխարհի ամենահարուստ
եկեղեցիներից է, ասում է հայոց թեմի առաջնորդ Աշոտ եպիսկոպոս
Մնացականյանը
13-01-2010 16:45:00 | Եգիպտոս | Հասարակություն
ԿԱՀԻՐԵ, 13 ՀՈՒՆՎԱՐԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ: Հայ
Առաքելական Եկեղեցու Եգիպտոսի թեմը միակն է Աֆրիկայում, եւ այդ
պատճառով ավելի պատրիարքարան է, քան թեմ, գրում է «Ալիքը»: Ըստ
թեմի առաջնորդ Աշոտ եպիսկոպոս Մնացականյանի, Կահիրեում եւ
Ալեքսանդրիայում այսօր 3 հազար հայ է բնակվում: Հայեր կան
Սուդանում, Եթովպիայում եւ Հարավ-Աֆրիկյան Հանրապետությունում:
«Հետաքրքրական է Եթովպիայի համայնքի կազմավորման պատմությունը:
Եթովպիայի նախկին թագավոր Հայլե Սելասսիեն մի առիթով լսել է հայ
որբ երեխաների երգչախմբի կատարումը եւ նրանց Թուրքիայից Ադդիս
Աբեբա է տեղափոխել: Բոլորին կրթություն, աշխատանք եւ ապաստան է
տվել: Այդ որբերն էլ դարձել են համայնքի հիմքը, ուր այսօր 100 հայ
կա: Մոտավորապես նույնքան հայ կա Սուդանում եւ Հարավ-Աֆրիկյան
Հանրապետությունում»,- ասել է սրբազան հայրը եւ ընդգծել, որ
Եգիպտոսի հայ համայնքը արձանագրվել է որպես կրոնական
փոքրամասնություն` առանց որեւէ սահմանափակման:
«Երկրի հիմնական քրիստոնեական բնակչությունը կազմող ղպտիների
հանդեպ, օրինակ, վերաբերմունքը այլ է: Նրանք կարող են հասնել որոշ
պետական պաշտոնների, բայց կան սահմաններ, որոնցից այն կողմ անցնել
չեն կարող: Միայն հայ համայնքն ունի կրոնական փոքրամասնության
կարգավիճակ, իսկ Եգիպտոսի հայկական եկեղեցին աշխարհի
ամենահարուստներից է»,- նշել է Աշոտ եպիսկոպոս Մնացականյանը:
Նա նաեւ հիշեցրել է, որ երկրի առաջին վարչապետն ու
արտգործնախարարը եղել է Պողոս Նուբար փաշան: «Նուբար փաշան
արժանացել է երկրի բարձրագույն պարգեւներին, պարգեւատրվել է
պատվավոր տիտղոսներով, նրա անունով փողոցներ են անվանակոչվել
Կահիրեում եւ Ալեքսանդրիայում»,- ասել է Սրբազան Հայրը: