Երգահան Վահրամ Սարգսյանը հաղթող է ճանաչվել Բոստոնի
երգչախմբային համույթի մրցանակաբաշխությունում
12-01-2010 14:05:00 | ԱՄՆ | Մշակույթ
ԲՈՍՏՈՆ, 12 ՀՈՒՆՎԱՐԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ: Բոստոնի
երգչախմբային համույթը ամփոփել է իր երրորդ ամենամյա հեղինակավոր
հանձնաժողովի մրցանակաբաշխության արդյունքները եւ հաղթող է
ճանաչվել երեւանաբնակ երգահան եւ գեղարվեստական ղեկավար Վահրամ
Սարգսյանը: Ինչպես տեղեկացնում է «Մարմարան», Սարգսյանն ընտրվել է
ավելի քան 80 տեղացի եւ արտասահմանցի մասնակիցներից` իր
ստեղծագործություններում արեւմտյան եւ արեւելյան երաժշտությունների
ազդեցությունը յուրահատուկ ձեւով միաձուլելու համար:
Բոստոնի երգչախմբային համույթի երաժշտական ղեկավար Միքել
Ֆելիպը նշել է, որ Սարգսյանի երաժշտությունը իսկապես տպավորություն
է գործել իրենց վրա:
Թերթից տեղեկանում ենք, որ Բոստոնի երգչախմբային համույթը
Նյու Ինգլանդ նահանգի առաջնակարգ կամերային երգչախմբերից մեկն է,
որ տարեկան 6-10 համերգ է տալիս: «Ուրախ ենք Սարգսյանի
երաժշտությունը Բոստոն բերելու համար: Դա մեզ կօգնի նոր ծրագրեր
մշակել եւ զանազան ավանդույթները միավորող անհրաժեշտ հատկանիշներ
գնտել»,- ասել է համույթի նախագահ Մեթյու Բագետյանը: