2007 Թ.-ԻՆ ՄԻ ՇԱՐՔ ՀԱՅԱՍՏԱՆՅԱՆ ԶԲՈՍԱՇՐՋԱՅԻՆ ԸՆԿԵՐՈՒԹՅՈՒՆՆԵՐ
USAID-Ի CAPS ԾՐԱԳՐԻ ՇՐՋԱՆԱԿՆԵՐՈՒՄ ԿՍՏԱՆԱՆ ՏԵԽՆԻԿԱԿԱՆ
ՕԺԱՆԴԱԿՈՒԹՅՈՒՆ
25-01-2007 19:00:00 | Հայաստան | Տնտեսություն
ԵՐԵՎԱՆ, 25 ՀՈՒՆՎԱՐԻ, ՆՈՅՅԱՆ ՏԱՊԱՆ: Հայաստանի հյուրանոցների
միությունը (ՀՀՄ), Հայաստանի զբոսավարների գիլդիան (ՀԶԳ),
Հայաստանի ներգնա տուրօպերատորների միությունը (ՀՆՏՄ),
Զբոսաշրջության զարգացման հայկական գործակալությունը (ԶԶՀԳ) եւ
Հայաստանի ռեստորանների ֆեդերացիան (ՀՌՖ) 2007թ.-ին կշարունակեն
համագործակցել ԱՄՆ Միջազգային զարգացման գործակալության (USAID)
«Մրցունակ մասնավոր հատված Հայաստանում» (CAPS) ծրագրի հետ եւ
կստանան տեխնիկական օժանդակություն: Այս մասին «ՆՈՅՅԱՆ ՏԱՊԱՆ»-ի
թղթակցին հայտնեց CAPS ծրագրի զբոսաշրջության կլաստերի համակարգող
Արմինե Իսրայելյանը:
Նրա խոսքերով, փետրվարի վերջին նախատեսվում է զբոսաշրջության
ոլորտի ամերիկացի փորձագետ Ջիմ Ֆիլիպսի այցելությունը Հայաստան,
որը մասնակցելու է թվարկված կազմակերպությունների այս տարվա
գործունեության ռազմավարության մշակման, ինչպես նաեւ տարեկան
բիզնես-պլանների կազմման աշխատանքներին:
Ըստ Ա.Իսրայելյանի, գարնանը ՀՀՄ-ի եւ ՀՌՖ-ի աշխատակիցների եւ
ղեկավար անձնակազմի համար չորրորդ անգամ կանցկացվեն
ծառայությունների մատուցման երկշաբաթյա դասընթացներ: Դասընթացները
կվարեն Ամերիկյան հյուրանոցների ասոցիացիայի բարձրակարգ
մասնագետները: Նախատեսվում է նաեւ թարմացնել նշված
կազմակերպությունների գործող ինտերնետային կայքերը եւ ստեղծել
կայքեր այն ընկերությունների համար, որոնք դեռեւս այն չունեն:
Նշվեց, որ CAPS ծրագրի շրջանակներում օժանդակություն կստանան
նաեւ արտերկրում Հայաստանի զբոսաշրջության ոլորտը ներկայացնող մի
շարք նախաձեռնություններ: