ՀՀ-ՈՒՄ ԱՄՆ-Ի ՆԱԽԿԻՆ ԴԵՍՊԱՆԸ ԴԱՐՁԱՎ ՀԱՅԱՍՏԱՆՈՒՄ ԳՈՐԾՈՂ
«ԳԼՈԲԱԼ ԳՈԼԴ» ՄԻՋԱԶԳԱՅԻՆ ԿՈՐՊՈՐԱՑԻԱՅԻ ԱՆԿԱԽ ՏՆՕՐԵՆ
14-12-2006 14:08:00 | Հայաստան | Տնտեսություն
ԵՐԵՎԱՆ, 14 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: ՀՀ-ում ԱՄՆ-ի նախկին
դեսպան Գարրի Հիլմորը, որն այդ պաշտոնը զբաղեցրել է 1993-95
թթ.-ին, ընտրվել է «Գլոբալ գոլդ» միջազգային կորպորացիայի անկախ
տնօրեն: Այս մասին «ՆՈՅՅԱՆ ՏԱՊԱՆ»-ի թղթակցին հայտնեցին
կորպորացիայի հայկական ներկայացուցչության մամուլի
ծառայությունում:
«Գլոբալ գոլդ» կորպորացիան իր գործունեությունն իրականացնում
է Չիլիում եւ Հայաստանում` ոսկու հանքարդյունաբերության զարգացման
եւ հետազոտությունների, արդյունահանության ոլորտում: «Գլոբալ
գոլդը» գրանցված է ԱՄՆ-ում, նրա շուկայական արժեքը կազմում է 30
մլն ԱՄՆ դոլար: Վերջին ժամանակներս «Գլոբալ գոլդը» իր կապիտալն
ավելացրել է եւս 13 մլն դոլարով:
Հայաստանում կորպորացիան իր աշխատանքները կենտրոնացրել է
Հյուսիս-կենտրոնական գոտում, որտեղ գտնվում են Հանքավանի եւ
Թուխմանուկի հանքավայրերը, ինչպես նաեւ 13 այլ հետազոտվող
տեղամասերում: