ԱԼԲԵՐՏ ԱԶԱՐՅԱՆ. ՍՊՈՐՏԱՁԵՎԻ ՊԱՏՇԱՃ ՖԻՆԱՆՍԱՎՈՐՄԱՆ ԴԵՊՔՈՒՄ
ՀԱՅԱՍՏԱՆԻ ՄԱՐՄՆԱՄԱՐԶԻԿՆԵՐԸ ԿԱՐՈՂ ԵՆ ՕԼԻՄՊԻԱԿԱՆ ՈՒՂԵԳԻՐ ՆՎԱՃԵԼ
28-11-2006 18:30:00 | Հայաստան | Սպորտ
ԵՐԵՎԱՆ, 28 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Դեկտեմբերի 13-16-ին
Մոսկվայում կանցկացվի օլիմպիական չեմպիոն Միխայիլ Վորոնինի
մրցանակների խաղարկություն: Ինչպես «ՆՈՅՅԱՆ ՏԱՊԱՆ»-ի թղթակցին
հայտնեց Հայաստանի մարմնամարզության ֆեդերացիայի նախագահ,
օլիմպիական խաղերի եռակի չեմպիոն Ալբերտ Ազարյանը, այս միջազգային
մրցաշարին մասնակցության հայտ են ներկայացրել 25 երկրների
մարմնամարզիկներ: Հայաստանից մոսկովյան մրցաշարին կմասնակցեն
փորձառու Վահագն Ստեփանյանը, Վահագն Դավթյանը, Նարեկ Ռաֆայելյանը,
Լիանա Կոբալյանը եւ Աստղիկ Գյուլնազարյանը: Մրցավարական
հանձնախմբում կլինի նաեւ Հայաստանի տղամարդկանց ազգային հավաքականի
ավագ մարզիչ Հակոբ Սերոբյանը:
Ա.Ազարյանը նշեց, որ սպորտային մարմնամարզությանը պետբյուջեից
տարեկան հատկացվում է ընդամենը 15 մլն դրամ (մոտ 39 հազ. ԱՄՆ
դոլար), ինչը չափազանց փոքր գումար է: Ըստ ֆեդերացիայի նախագահի,
եթե նոր մրցաշրջանում կառավարությունը գոնե կրկնապատկի գումարի
չափը, ապա հնարավոր է հայ մարմնամարզիկները ձեռք բերեն օլիմպիական
խաղերի ուղեգիր: Ա.Ազարյանը հիշեցրեց, որ օլիմպիական խաղերի առաջին
հայաստանցի չեմպիոնը` Հրանտ Շահինյանը, մարմնամարզիկ է: Նրան
հաջորդել են հայր եւ որդի Ազարյանները, օլիմպիական փոխչեմպիոն
Էդվարդ Միքայելյանը: Իսկ Խորհրդային միության, Եվրոպայի եւ աշխարհի
առաջնություններում հաջողության են հասել տասնյակ հայ
մարմնամարզիկներ: