ԵՐԵՎԱՆՈՒՄ ՆՈՅԵՄԲԵՐԻ 13-ԻՆ ԿԿԱՅԱՆԱ «ՍՊԵՂԱՆԻ» ԵՐԳՉԱԽՄԲԻ
ՀՈԲԵԼՅԱՆԱԿԱՆ ՀԱՄԵՐԳԸ
10-11-2006 15:21:00 | Հայաստան | Մշակույթ
ԵՐԵՎԱՆ, 10 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Նոյեմբերի 13-ին Երեւանի
Կոմիտասի անվան կամերային երաժշտության տանը կկայանա միջազգային
մրցույթների դափնեկիր «Սպեղանի» երգչախմբի հոբելյանական համերգը:
Ինչպես նոյեմբերի 10-ի ասուլիսում հայտնեց երգչախմբի գեղարվեստական
ղեկավար եւ խմբավար Սարինա Ավթանդիլյանը, համերգը հոբելյանական է.
այն նվիրված է երգչախմբի 10-ամյակին:
«Սպեղանիի» կազմում ընդգրկված են Արցախյան պատերազմում զոհված
ազատամարտիկների երեխաները: 30 հոգանոց երգչախմբի երգացանկում
ընդգրկված են հայ հոգեւոր միջնադարյան երաժշտության նմուշներ,
Կոմիտասի, Մակար Եկմալյանի, ինչպես նաեւ ժամանակակից հայ եւ
այլազգի կոմպոզիտորների ստեղծագործություններ:
Ս.Ավթանդիլյանը նշեց, որ 2004թ.-ին «Սպեղանին» արժանացել է
Իտալիայի Արեցցո քաղաքում կայացած խմբերգային երաժշտության
հեղինակավոր մրցույթի 2-րդ մրցանակին: Իսկ այս տարի Շվեյցարիայում
կայացած մրցույթի ժամանակ «Սպեղանին» ընդգրկվել է 12 երգչախմբերի
շարքում, որոնք 2007թ.-ին Բազելում (Շվեյցարիա) կմասնակցեն
Եվրոպական երիտասարդական երգչախմբերի փառատոնին: Ս.Ավթանդիլյանը
նշեց նաեւ, որ Շվեյցարիայի մի քանի եկեղեցիներում երգչախումբը
կկատարի Կոմիտասի «Պատարագը»:
Հաջորդ տարի «Սպեղանին» կմեկնի նաեւ Գերմանիա` մասնակցելու
կամերային երգչխմբերի մրցույթին: Գերմանիայի եկեղեցիներում, ըստ
Ս.Ավթանդիլյանի, երգչախումբը կներկայացնի հայ հոգեւոր միջնադարյան
երաժշտությունը եւ Կոմիտասի ստեղծագործությունները: