ԲԱՔՈՒ, 18 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: ՆԱՏՕ-ի Խորհրդարանական վեհաժողովի պաշտպանության հետագա պլանավորման ենթակոմիտեի պատվիրակության ղեկավար Վահիդ Էրդեմը հոկտեմբերի 17-ին Բաքվում մամուլի ասուլիս է անցկացրել այցի արդյունքների առնչությամբ: Էրդեմը հայտարարել է, որ Ադրբեջան կատարած այցի գլխավոր նպատակն է հանդիպել իշխանության, ոչ կառավարական կազմակերպությունների եւ ԶԼՄ-ների պաշտոնական ներկայացուցիչների հետ, ծանոթանալ առկա իրադրությանը ՆԱՏՕ-ին ինտեգրվելու ճանապարհին: Այդ եզրակացությունները կարտացոլվեն «ՆԱՏՕ-ի դերը Հարավային Կովկասում» նրա ամփոփիչ հաշվետվության մեջ: «Մոտ ժամանակներս Կանադայում կանցկացվի իմ ղեկավարած կոմիտեի ժողովը, որտեղ վերջին անգամ կքննարկվի զեկույցը: Ադրբեջանական կողմը առաջադրել է որոշ առաջարկություններ իմ պատրաստած զեկույցի առնչությամբ, եւ մենք հաշվի կառնենք այդ առաջարկությունները»,- ասել է Վահիդ Էրդեմը: Տեղեկացնելով ՆԱՏՕ-ի հետ Ադրբեջանի հաջող համագործակցության մասին, Էրդեմը հիշեցրել է, որ այդ կազմակերպության խաղաղարարական բանակի կազմում զանազան տարածաշրջաններում ծառայում են Ադրբեջանի մոտ 300 զինծառայողներ: Ի պատասխան Լեռնային Ղարաբաղում խաղաղարարական ուժերի տեղակայման վերաբերյալ հարցին, նա հայտնել է, որ դա հնարավոր է երկու երկրների միջեւ խաղաղության ձեռք բերումից հետո. «Խաղաղարարները կարող են տարածաշրջանում տեղակայվել Հայաստանի եւ Ադրբեջանի միջեւ խաղաղության հաստատումից հետո»: Էրդեմը նշել է նաեւ, որ ի տարբերություն Ադրբեջանի, Հայաստանում ՆԱՏՕ-ի հանդեպ վերաբերմունքը միանշանակ չէ»,- հաղորդում է «Ազերի-պրես» գործակալությունը:

---