ԼԻՆՅԱՆՈ, 25 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Իտալիայի Լինյանո քաղաքում սեպտեմբերի 11-22-ին անցկացվեց վետերան` 60-ից բարձր տարիքի, շախմատիստների առաջնությունը: Շվեյցարական մրցակարգով անցկացված մրցաշարի 124 մասնակիցներից 9-ը գրոստմայստեր էր, 11-ը` միջազգային վարպետ: Հայաստանը ներկայացնում էր վետերանների 2006թ-ի հանրապետության չեմպիոն, Գյումրիի պոլիտեխնիկական ինստիտուտի դասախոս, 61-ամյա Ալեքսան Մանուկյանը: Նա 11 հնարավորից վաստակեց 6 միավոր եւ գրավեց 46-րդ տեղը: Առաջնության հաղթող ճանաչվեց ամենատարեց մասնակիցը` Շվեյցարիայի ներկայացուցիչ, 75-ամյա լեգենդար շախմատիստ Վիկտոր Կորչնոյը: Նա առանց պարտության անցկացրեց բոլոր հանդիպումները, 11 հնարավորից վաստակեց 9 միավոր եւ գրավեց 1-ին տեղը:

---