ՏԵՂԱԿԱՆ ԻՆՔՆԱԿԱՌԱՎԱՐՄԱՆ ՄԱՐՄԻՆՆԵՐՈՒՄ ԱՆՀՐԱԺԵՇՏ Է ՆԵՐԴՆԵԼ
ՍՈՑԻԱԼԱԿԱՆ ՔԱՂԱՔԱԿԱՆՈՒԹՅԱՆ ՀԱՅԵՑԱԿԱՐԳ
25-09-2006 16:30:00 | Հայաստան | Հասարակություն
ԵՐԵՎԱՆ, 25 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: ՀՀ նախագահին առընթեր
Տեղական ինքնակառավարման հարցերի հանձնաժողովի, «Առաքելություն
Հայաստան» բարեգործական հասարակական կազմակերպության եւ «Հայաստանի
համայնքների հանրապետական ասոցիացիայի» համատեղ նախաձեռնությամբ
սեպտեմբերի 25-ին կայացավ «Համայնքային մակարդակում մոդելային
սոցիալական քաղաքականության եւ սոցիալական գործընկերության
զարգացման խնդիրներ» թեմայով «կլոր սեղան»: Հանդիպման ընթացքում
քննարկվեց համայնքային մակարդակում արդյունավետ սոցիալական
քաղաքականության հայեցակարգի մշակման եւ ներդրման, ինչպես նաեւ
համայնքներում սոցիալական գործընկերության զարգացման
հիմնախնդիրները:
Ինչպես նշեց փորձագետ Աշոտ Եսայանը, Հայաստանի 930
համայնքներում կան բազմաթիվ հիմնախնդիրներ, որոնք ՀՀ կառավարության
կողմից 2003թ.-ի օգոստոսին ընդունված Աղքատության հաղթահարման
ռազմավարական ծրագրում ներկայացված չեն: Ըստ նրա, «կառավարությունը
մեծ կառույց լինելով, պարզապես ի վիճակի չէ նկատել համայնքներում
առկա բոլոր հիմնախնդիրները»: Ա.Եսայանը նշեց, որ այս նպատակով
անհրաժեշտ է տեղական ինքնակառավարման մարմիններին տալ սոցիալական
ծրագրերի իրականացման լիազորություններ: Ըստ նրա, դա
հնարավորություն կտա ավելի մատչելի եւ հասցեական դարձնել պետության
կողմից ցուցաբերվող սոցիալական աջակցությունը: