ՄԻՔԱՅԵԼ ԻՍՊԻՐՅԱՆ. «ԱՆԿԱԽՈՒԹՅՈՒՆԸ ՀԱՅՐԵՆԱԿԱՆ ՍՊՈՐՏԻՆ ՏՎԵՑ
ԱՇԽԱՐՀԻՆ ԱՌԱՆՁԻՆ ՀԱՎԱՔԱԿԱՆՈՎ ՆԵՐԿԱՅԱՆԱԼՈՒ ՀՆԱՐԱՎՈՐՈՒԹՅՈՒՆ»
20-09-2006 18:22:00 | Հայաստան | Սպորտ
ԵՐԵՎԱՆ, 20 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Ամենակարեւորը, որ տվեց
Հայաստանի անկախացումը հայրենական սպորտին, դա 1990թ. հոկտեմբերի
24-ին Հայաստանի ազգային օլիմպիական կոմիտեի (ՀԱՕԿ) ստեղծումն է:
Այս կարծիքը հայտնեց «ՆՈՅՅԱՆ ՏԱՊԱՆ»-ի թղթակցի հետ զրույցում ՀՀ
Ֆիզկուլտուրայի եւ սպորտի վաստակավոր գործիչ, պատմագիտության
դոկտոր Միքայել Իսպիրյանը: Դրա շնորհիվ, ըստ նրա, Հայաստանը
1993թ.-ին սեպտեմբերի 24-ին ճանաչվեց միջազգային օլիմպիական
կոմիտեի կողմից, ինչից հետո առանձին պատվիրակությամբ` իր դրոշով եւ
օրհներգով է ներկայանում օլիմպիական խաղերին: Ներկայումս ՀԱՕԿ-ը
միավորում է օլիպիական 30 մարզաձեւերի ազգային ֆեդերացիաներ, ոչ
օլիմպիական մարզաձեւերի 5 ֆեդերացիաներ եւ 17 հասարակական
կազմակերպություններ:
Բացի օլիմպիական խաղերից, Հայաստանի հավաքականները մասնակցում
են աշխարհի եւ Եվրոպայի առաջնություննեին, ինչպես նաեւ բազմաթիվ
միջազգային մրցաշարերի: Եվ, ըստ Մ.Իսպիրյանի, բնական է, որ այժմ
արդեն տարբեր մրցասպարեզներում ավելի հաճախ է հոլովվում «Հայաստան»
բառը եւ երկիրը ներկայանալի է դառնում համայն աշխարհին: Բնական է
նաեւ, որ հայ մարզիկներին հաշվին արձանագրվել բազում
հաջողություններ: Օրինակ, հունահռոմեական ոճի ըմբիշ Արմեն
Նազարյանը 1996թ-ին Ատլանտայում դարձավ անկախ Հայաստանի առաջին
օլիմպիական չեմպիոնը: Նույն մրցումներում մեկ այլ ըմբիշ, ազատ
ոճային Արմեն Մկրտչյանը արժանացավ «արծաթի»: Իսկ 2000թ.-ի
օլիպիադայում պատվանդանի «բրոնզե» աստիճանին կանգնեց ծանրորդ Արսեն
Մելիքյանը: Ընդհանրապես 1997-2006թթ.-ին աշխարհի, Եվրոպայի
առաջնություններում (տարբեր տարիքային խմբերում) եւ օլիմպիական
խաղերում Հայաստանի մարզիկները նվաճել են ավելի քան 630 մեդալ:
Մ.Իսպիրյանը նշեց, որ մարզական հաջողությունները զարգացնելու
նպատակով Հայաստանի կառավարությունը, պետական ու հասարակական
տարբեր կազմակերպություններ վերջին տարիներին լուրջ աշխատանքներ են
կատարում մարզադպրոցների վերանորոգման եւ բարեկարգման ուղղությամբ:
Այդ մարզօջախներին կառավարությունը գերատեսչական պատկանելությունից
անկախ տրամադրում է անհրաժեշտ մարզագույք եւ հանդերձանք:
«Իհարկե, կան նաեւ թերություններ, որոնք կհաղթահարվեն առաջիկա
տարիներին: Կարեւորը այն է, որ անկախ ենք եւ մեր պատվիրակները
աշխարհին են ներկայանում «Հայաստան» մակագրությամբ մարզազգեստով»,-
ասաց Մ.Իսպիրյանը: