ՀԱՅԿԱԿԱՆ ՊԱՏՎԻՐԱԿՈՒԹՅՈՒՆԸ ՄԱՍՆԱԿՑՈՒՄ Է ՎԵՆԵՏԻԿՈՒՄ ԲԱՑՎԱԾ
ՄԻՋԱԶԳԱՅԻՆ ՃԱՐՏԱՐԱՊԵՏԱԿԱՆ ԲԻԵՆԱԼԵԻՆ
14-09-2006 21:20:00 | Իտալիա | Մշակույթ
ՎԵՆԵՏԻԿ, 14 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ:
Սեպտեմբերի 9-ին Վենետիկում Ջիարդինի դի Կաստելլո ե Արսենալե
(Giardini di Castello e Arsenale) վայրում բացված` «Քաղաքներ.
հասարակություն եւ ճարտարապետություն» խորագիրը կրող 10-րդ
Միջազգային ճարտարապետական բիենալեին մասնակցում է նաեւ ՀՀ
պատվիրակությունը` ՀՀ Ճարտարապետության ազգային
թանգարան-ինստիտուտի տնօրեն Աշոտ Գրիգորյանի գլխավորությամբ:
Հայաստանի պատվիրակությունը, ինչպես նաեւ Չիլիի, Կոլումբիայի
եւ Մակեդոնիայի պատվիրակությունները հյուրընկալվել են Վենետիկի
Մուրադ Ռաֆայելյան վարժարանին պատկանող Պալացցո Զենոբիո (Palazzo
Zenobio) պալատում, որտեղ էլ տեղի է ունեցել նշված երկրների
տաղավարների պաշտոնական բացումը, որի ժամանակ ողջույնի խոսքով
հանդես է եկել Իտալիայում ՀՀ դեսպանության ներկայացուցիչը:
Ինչպես «ՆՈՅՅԱՆ ՏԱՊԱՆ»-ին հայտնում են ՀՀ ԱԳՆ մամուլի եւ
տեղեկատվության վարչությունից, հայկական տաղավարում ներկայացված են
ճարտարապետներ Լեւոն Վարդանյանի, Հովհաննես Մութաֆյանի, Գագիկ
Հովհաննիսյանի (Երեւան) եւ Դեյվիդ Հադսոնի (ԱՄՆ) հեղինակային
աշխատանքները:
Բիենալեի աշխատանքները շարունակվելու են մինչեւ նոյեմբերի
20-ը: