ԵՐԵՎԱՆ, 27 ՀՈՒՆԻՍԻ, ՆՈՅՅԱՆ ՏԱՊԱՆ: Պետության հիմնը պիտի լինի այդ երկրի պատմությունը խտացնող եւ ներկայացնող ձոն, աղոթք, այլ ոչ թե երաժշտական ինչ-որ ստեղծագործություն: Այսպիսի կարծիք հայտնեց ՀՀ օրհներգի տեքստի եւ երաժշտության ընտրության նպատակով ստեղծված հանձնաժողովի անդամ, բանաստեղծ Դավիթ Հովհաննեսը հունիսի 27-ի ասուլիսում: Նրա խոսքերով, պետք է ընտրել հիմնի այն տարբերակը, որը կունենա քայլերգի տարրեր` ռազմական տոնայնությամբ: Միեւնույն ժամանակ նա որպես ՀՀ հիմներգ է առաջարկում կոմիտասյան մշակմամբ «Հայաստան երկիր դրախտավայր» ստեղծագործությունը, որը, նրա խոսքերով, համապատասխանում է մեր երկրի պատմության ընթացքին, ինչպես նաեւ աղոթքի ազդեցություն է թողնում: Գրող, հրապարակախոս Պերճ Զեյթունցյանի համոզմամբ, չպետք է մերժել հիմներգի ընտրության հնարավոր բոլոր տարբերակները եւ հիմնվել միայն Արամ Խաչատրյանի ստեղծագործության վրա: «Եթե լինի այնպիսի մի հիմն, որն ավելի լավը լինի, քան նախորդը, ապա այն նախընտրելի կլինի իմ կողմից»,- ասաց Պ.Զեյթունցյանը: Գրողը առաջարկում է այնպիսի ընտրություն կատարել, որ արտահայտի «ժողովրդականը, ազգայինը եւ հոգեհարազատ լինի յուրաքանչյուր հայ մարդու համար»:

---