«ԲԱՆԿԱՅԻՆ ԱՐՔԱ»-Ն` ՇԱԽՄԱՏԻ ՀԱՅԱՍՏԱՆԻ ԱԿՈՒՄԲԱՅԻՆ ՉԵՄՊԻՈՆ
23-01-2006 18:10:00 | Հայաստան | Սպորտ
ԵՐԵՎԱՆ, 23 ՀՈՒՆՎԱՐԻ, ՆՈՅՅԱՆ ՏԱՊԱՆ: Երեւանում անցկացված
շախմատի Հայաստանի ակումբային 2-րդ առաջնությունում հաղթեց
«Բանկային արքա» թիմը: 6 թիմերի մասնակցությամբ ընթացած
մրցումներում Հայաստանի ուժեղագույն շախմատիստներով համալրված
«Բանկային արքա»-ն 4 հանդիպում շահեց, 1-ն ավարտվեց ոչ-ոքի եւ 9
միավորով գրավեց 1-ին տեղը: 2-րդը «Շախմատի ակադեմիա»-ն էր (8
միավոր), 3-րդը` Ֆիզկուլտուրայի ինստիտուտի մարզական ակումբը (6):
Հաջորդ տեղերում են «Շախմատի դպրոց» (5 միավոր), «Արաբկիր» (2) եւ
«Գյումրի» (0) թիմերը:
Մրցանակակիրները պարգեւատրվեցին համապատասխանաբար 1-ին, 2-րդ,
3-րդ կարգի դիպլոմներով եւ 450 հազար, 400 հազար, 350 հազար դրամ
մրցանակներով: Բացի այդ, չեմպիոնին հանձնվեց փոխանցիկ գավաթը:
Համաձայն կանոնադրության, «Բանկային արքա» եւ «Շախմատի
ակադեմիա» թիմերն իրավունք ստացան մասնակցելու Եվրոպայի ակումբային
առաջնությանը, որը տեղի կունենա Ավստրիայում, հոկտեմբեր ամսին: