ՀԱՅԱՍՏԱՆՈՒՄ ԳՈՐԾԱԶՈՒՐԿԻ ԿԱՐԳԱՎԻՃԱԿ ՈՒՆԵՑՈՂՆԵՐԻ 70,3%-Ը
ԿԱՆԱՅՔ ԵՆ
05-10-2005 17:40:00 | Հայաստան | Հասարակություն
ԵՐԵՎԱՆ, 5 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Հայաստանում տնտեսապես
ակտիվ բնակչության միջին թվաքանակը այս տարվա հունվար-օգոստոսին
կազմել է 1213,5 հազար մարդ, որոնց 91,6%-ը կամ 1111,9 հազարն է
զբաղված եղել տնտեսության մեջ: Իսկ 101,6 հազար աշխատանք չունեցող
մարդ հաշվառվել է ՀՀ Աշխատանքի եւ սոցիալական հարցերի
նախարարության «ՀՀ Զբաղվածության ծառայություն» գործակալությունում
եւ ստացել գործազուրկի կարգավիճակ:
ՀՀ Ազգային վիճակագրական ծառայության տվյալներով, 2005թ.-ի
օգոստոսի վերջի դրությամբ գործակալությունում հաշվառման կանգնած
124,3 հազար աշխատանք փնտրողներից 93,4%-ը կամ 116,1 հազար մարդ
եղել են չզբաղվածներ: Գործազուրկի կարգավիճակ ունեցել են
չզբաղվածների 79,6%-ը կամ 92,4 հազար մարդ, որոնց 70,3%-ը կազմել
են կանայք: Նախորդ տարվա նույն ամսվա համեմատ գործազուրկի
կագավիճակ ստացած կանանց թիվը աճել է 0,5%-ով:
Օգոստոսի վերջի դրությամբ պաշտոնապես հայտարարված աշխատուժի
պահանջարկը կազմել է 1024 մարդ, այդ թվում` 71,5%-ը կամ 732-ը`
բանվորական տեղերի համար: