ՌՈԲԵՐՏ ԷՄՄԻՅԱՆԻ ԳԱՎԱԹՆ ԱՅՍ ԱՆԳԱՄ ՆՎԱՃԵՑ ՈՒԿՐԱԻՆԱՅԻ ՄԱՐԶԻԿԸ
05-09-2005 17:48:00 | Հայաստան | Սպորտ
ԵՐԵՎԱՆ, 5 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Ճանաչված ատլետ,
հեռացատկի Եվրոպայի ռեկորդակիր Ռոբերտ Էմմիյանի գավաթի
խաղարկության մրցումներն այս անգամ անցկացվեցին Վանաձորում:
Մրցանակի համար պայքարեցին 7 երկրների` Ռուսաստանի, Ուկրաինայի,
Վրաստանի, Գերմանիայի, Չեխիայի, Բուլղարիայի եւ Հայաստանի, 8
մարզիկներ:
Հետաքրքիր մրցապայքարի արդյունքում 1-ին տեղը գրավեց
Ալեքսանդր Սոլդատկինը (Ուկրաինա), որը հեռացատկեց 7 մ 72 սմ: Նա
դարձավ Ռ.Էմմիյանի գավաթի 4-րդ խաղարկության հաղթող եւ անվանի
մարզիկի ձեռքից ստացավ գլխավոր մրցանակը: 2-րդ տեղը գրավեց Եվգենի
Տրետյակը (Ռուսաստան)` 7 մ 55 սմ արդյունքով, իսկ 3-րդ մրցանակակիր
դարձավ Արսեն Սարգսյանը (Հայաստան), որը ցույց տվեց 7 մ 48 սմ
արդյունք:
Ինչպես մրցումների ավարտից հետո հայտարարեց Ռ.Էմմիյանը, իր
անունը կրող գավաթի հաջորդ խաղարկությունը, ամենայն
հավանականությամբ, կանցկացվի իր հարազատ քաղաքում` Գյումրիում: