ԵՐԵՎԱՆ, 29 ԱՊՐԻԼԻ, ՆՈՅՅԱՆ ՏԱՊԱՆ: Ապրիլի 28-29-ին Երեւանի
«Արարատ» հյուրանոցում տեղի ունեցավ Համահայկական խաղերի
Համաշխարհային կոմիտեի (ՀԽՀԿ) վեհաժողովը: Քննարկվեցին
կանոնակարգային հարցեր, որոնց վերաբերյալ զեկուցեց ՀԽՀԿ-ի
փոխնախագահ Ռոլանդ Շառոյանը: Նշվեց, որ գնալով ավելի շատ
մարզաձեւեր են տեղ գտնում խաղերի ծրագրում: Մասնավորապես,
առաջարկվում է 2007թ.-ին կայանալիք 4-րդ խաղերի ծրագրում ընդգրկել
գերերկար տարածության վազքը` այն անվանելով «Երեւանյան մարաթոն»:
Իսկ մինչ այդ` 2005թ.-ի օգոստոսին, Երեւանում կանցկացվի բասկետբոլի
համահայկական մրցաշար: Այդ մրցումներին մասնակցելու ցանկություն
արդեն իսկ հայտնել են աշխարհի 26 քաղաքների թիմեր:
Երեւանյան վեհաժողովում տեղի ունեցավ ՀԽ Համաշխարհային
կոմիտեի ամենաակտիվ անդամներից մեկի` ամերիկաբնակ Ալբերտ
Բոյաջյանի, խաղերի մեդալով պարգեւատրումը: