ՀԱՅԱՍՏԱՆՈՒՄ ԼԻՑԵՆԶԱՎՈՐՎԱԾ ԵՆ 636 ՏԱՔՍԻ ԾԱՌԱՅՈՒԹՅՈՒՆՆԵՐ`
5319 ԱՎՏՈՄԵՔԵՆԱՆԵՐՈՎ
28-11-2008 19:56:00 | Հայաստան | Տնտեսություն
ԵՐԵՎԱՆ, 28 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Տաքսի ծառայություններ
մատուցող ընկերությունների լիցենզավորման գործընթացի սկզբից`
2008թ.-ի ապրիլի 1-ից, ընդհանուր առմամբ լիցենզավորվել են տաքսի
ծառայություն մատուցող 636 ընկերություններ` 5319 մեքենաներով:
Միայն վերջին 10-20 օրվա ընթացքում տաքսի ծառայությունների
լիցենզավորման կամ արդեն լիցենզավորված ծառայություններում նոր
մեքենաների հաշվառման համար ՀՀ Տրանսպորտի եւ կապի նախարարության
Տրանսպորտային տեսչություն են դիմել 64 ընկերություններ:
Լիցենզավորմանը զուգահեռ իրականացվող սովորական մեքենաների
«սպիտակ» համարանիշերը տաքսիների «դեղինի» փոխարինելու գործընթացի
արդյունքում տրվել են 550 «դեղին» համարանիշեր: Նշված ցուցանիշների
մոտ 70%-ը վերաբերում է Երեւանին: Այս մասին նոյեմբերի 28-ին
ասուլիսում հայտնեց Տրանսպորտային տեսչության պետի տեղակալ Հայկ
Մարտիրոսյանը:
Ըստ նրա, մինչ նոյեմբերի սկիզբը նախարարության Տրանսպորտային
տեսչության եւ ՀՀ Ճանապարհային տեսչության ամբողջ Հայաստանում
ապրիլի 1-ից մինչ նոյեմբերի սկիզբը իրականացրած համատեղ
ստուգայցերի արդյունքում կազմվել է մոտ 510 արձանագրություն, իսկ
նոյեմբերին` 560 արձանագրություն: Հ.Մարտիրոսյանը նշեց, որ
ստուգայցերը շարուկական բնույթ են կրելու` հիշեցնելով, որ անհատ
տաքսիստների գործունեության նկատմամբ վերահսկողությունը
իրականացվելու է «Լիզենզավորման մասին» եւ «Պետական տուրքի մասին»
ՀՀ օրենքների դեկտեմբերի 6-ին ուժի մեջ մտնող փոփոխությունների եւ
լրացումների համաձայն: Ըստ տեսչության պետի տեղակալի, անհատ
տաքսիստները նախկինում եւս պետք է լիցենզավորեին իրենց
գործունեությունը, սակայն դա չէին անում տարբեր
պատճառաբանություններով, եւ վերը նշված ստուգայցերի ժամանակ
նրանցից 400-450-ին տեսչությունը ներկայացրել է գրավոր
զգուշացումներ, որոնք պարունակել են լիցենզավորման կարգի
պահանջները: Նրա գնահատմամբ, մինչ այժմ լիցենզավորվել է անհատ
տաքսիստների 10-15%-ը:
Հ.Մարտիրոսյանի խոսքերով, թեեւ տաքսիների լիցենզավորման
հայտերի քննարկման օրենքով սահմանված ժամկետը 1 ամիս է, ամեն շաբաթ
անցկացվում են նախարարության Լիցենզավորման հանձնաժովի երկու-երեք
նիստեր:
Նշվեց, որ անհատ ձեռներեց տաքսիստների լիցենզավորման
պետտուրքը տարեկան 25 հազար դրամ է (մոտ 82 ԱՄՆ դոլար):
Լիցենզավորման են ենթակա մինչեւ 10 տարի շահագործվող մեքենաները:
Չլիցենզավորված տաքսի ծառայության մատուցումը առաջին անգամ ենթակա
է տուգանքի 20 հազ. դրամի, երկրորդ անգամ նշված խախտումը կատարելու
դեպքում` 40 հազ. դրամի չափով: Տուգանքների չվճարման դեպքում
տեսչությունը դիմում է դատարան` տուգանքը բռնագանձելու հայցով:
Տաքսի ծառայություն մատուցող մեկ մեքենայի համար «դեղին» համարանիշ
ստանալու համար վճարվում է 13,5 հազ. դրամ: Նախատեսվում է
օրենսդրորեն սահմանել լիցենզավորումից հետո այդ համարանիշերի
ստացման 5-օրյա վերջնաժամկետ: